A área comprendida entre San Roque, Raíña Vitoria Uxía, Rosalía de Castro e a Avenida de Marín centrará unha "grande intervención" que está preparando o Concello de Pontevedra. Avanzouno este mércores o edil de Obras, Demetrio Gómez, quen salientou que se busca "gañar espazos" para a cidade —como as beiras da desembocadura do Gafos— e mellorar a conexión desta área co resto da urbe, a mobilidade no barrio e a seguridade, así como o acceso aos centros de ensino.
"É unha das actuacións máis ambiciosas que imos poñer en marcha neste mandato", dixo Gómez, quen lembrou que será a terceira no "mandato dos barrios", tras as que se están realizando na área de Eduardo Pondal-O Gorgullón e a do barrio do Burgo.
Estanse realizando estudos para planificar as actuacións máis acaídas, incluído un coa Asociación Amizade para analizar a accesibilidade en todo o barrio e identificar os problemas. Hai outro estudo en proceso de contratación centrado na mobilidade na zona.
"Actuar na ribeira dos Peiraos ou na rúa do Monte do Taco, que son as dúas beiras da desembocadura do río do Gafos, permitiranos gañar un amplo espazo para todas as persoas do barrio e tamén para as que usan a beira da ría", asegurou Demetrio Gómez. A maiores, salientou que se busca eliminar o "efecto barreira" que existe actualmente na contorna da rúa Raíña Vitoria e que impide a conexión fluída coa zona da Alameda e do parque das Palmeiras.
Polo demais, o Concello aspira a mellorar a mobilidade interior no barrio, "suprimindo os conflitos entre a mobilidade peonil e a motorizada e promovendo a circulación peonil nas beiras do Gafos".
