sábado. 27.11.2021 |
El tiempo
sábado. 27.11.2021
El tiempo

LOS GANADORES

Os premios Xerais chegan á cidade de Pontevedra

Os tres gañadores dos premios da editorial Xerais posando xuntos onte na Illa de San Simón.
Os tres gañadores dos premios da editorial Xerais posando xuntos onte na Illa de San Simón.
Santiago Lopo faise co premio de novela pola obra 'A arte de trobar' e Manuel Lourenzo gaña o Jules Verne de Literatura Xuvenil por 'Ceiba de luz' ►O terceiro galardón que entrega anualmente a editorial, o Merlín de Literatura Infantil, foi para a ceense María Canosa

O autor vigués afincado en Pontevedra Santiago Lopo e o mestre e escritor de Vilaboa Manuel Lourenzo fixéronse onte con dous dos tres premios que entrega anualmente a editorial Xerais. Lopo conseguíu o de novela pola obra 'A arte de trobar' mentres que Lourenzo se fixo co Jules Verne de Literatura Xuvenil por 'Ceiba de luz'. A terceira galardoada foi María Canosa (Cee, A Coruña, 1978), que gañou o Merlín de Literatura Infantil e Xuvenil pola obra titulada 'Muriel'. Cada un deles está dotado con 10.000 euros.

A Illa de San Simón, en Redondela, acolleu onte a entrega dos Premios Xerais, que se celebrou no transcurso dunha velada cultural á que asistiron 300 persoas, segundo informaron os organizadores. A condutora da cerimonia foi a directora de promoción e prensa de Xerais, Celia Torres, que abriu o acto lembrando a figura do escritor Agustín Fernández Paz, finado o pasado verán e ao que se lle adicaba a edición dos premios deste ano. Torres destacou, ademais, a continuidade acadada no contexto literario galego destes recoñecementos (o de novela leva entregándose 34 anos, o de literatura infantil 32 e o de literatura xuvenil nove). En 2017, neles participaron 96 orixinais repartidos entre as tres categorías.

FERNÁNDEZ PAZ. Segundo informou Xerais, tras Torres interveu a tradutora Isabel Soto para presentar 'Un mundo de palabras', un traballo no que se recollen os textos de Fernández Paz sobre o libro e o fomento da lectura. Soto, editora literaria deste título, sinalou que "nesta obra de Agustín Fernández Paz cúmprese á perfección o principio de que a lectura e a escritura son as dúas caras dunha mesma moeda, e de que todo escritor, antes de selo, é lector".

O mantedor literario da entrega de premios foi o escritor e divulgador científico Xurxo Mariño e o apartado musical correu a cargo da Banda dos Cueiros. O acto pechouno o director de Xerais, Manuel Bragado.

No caso do premio a María Canosa, que xa fora finalista do Merlín en dúas ocasións, o xurado destacou que presentara unha historia "orixinal e sedutora, na que cada palabra conta, pois esa é a súa esencia, a das palabras, a das que se din e a das que se calan". Segundo explicou a autora ao saberse gañadora, "non pretendo unha obra moralista, máis quixera afondar na xustiza a na honestidade de xeito natural".

Os premios Xerais chegan á cidade de Pontevedra
Comentarios
ç