Dende o 1 de xaneiro de 2021, o Pazo da Cultura e o Teatro Principal, que ata o momento funcionaban como un organismo autónomo, dependerán directamente do Concello de Pontevedra. Vén de anuncialo a concelleira de Cultura, Carme Fouces, que este mércores sinalou que había tempo que se viña pensando nesta actuación e que seguiría o mesmo procedemento administrativo que se empregara co Instituto Municipal de Deportes (IMD), agora integrado tamén no Concello.
ℹ Máis información
Este xoves na edición en papel de Diario de Pontevedra
"Estas estruturas tiveron o seu interese en certo momento para acceder a patrocinadores ou axudas económicas, pero agora mesmo xa non son necesarias", explicou Fouces, que contou que, entre as razóns que levaban a tomar esta decisión, estaban as económicas. "Agora mesmo, o Pazo necesitaría uns servizos de seguridade e saúde propios moi difíciles de asumir. Consumiría moitísimos recursos e aínda facéndoo quedariamos coxos. Non parece lóxico ter que duplicar servizos".
Para Fouces, que Pazo e Teatro pasen a ser servizos propios do Concello cumpre un dobre obxectivo: "Mellorar a xestión dos espazos e optimizar recursos económicos".
O anuncio da disolución do organismo autónomo fíxose nunha rolda de prensa na que a concelleira anunciou un plan de reactivación cultural para Pontevedra que inclúe a elaboración dun informe sobre a situación do sector na cidade, realizado en colaboración coa Universidade de Vigo; distintas reformas nos equipamentos do Pazo da Cultura e do Teatro Principal, e a constitución dun Consello Asesor Cultural de Pontevedra, que quere poñer neste último trimestre do ano.
