Un calendario de actividades ambientado no Polo Norte, cunha carpa iglú de 450 metros cadrados na Praza de España, unha tirolina ártica de 150 metros con luces na Alameda e foodtrucks e obradoiros itinerantes nos barrios de Monte Porreiro, Pontevedra Leste e O Burgo. Esta é a atractiva proposta de lecer infantil que a Concellería de Promoción Económica, dirixida pola socialista Yoya Blanco, traerá a Pontevedra durante as festas de Nadal a través de Ponte Xogos 2019.
A carpa iglú será inaugurada o 20 de decembro ás 16.30 horas e permanecerá aberta ata o 3 de xaneiro de 12.00 a 14.00 e de 16.30 a 19.30 horas.
Entre as actividades organizadas inclúese un espazo de interacción entre pais, nais e fillos de 0 a 3 anos que conta cunha piscina de bolas; e o pobo esquimal, composto por un iglú inchable no que se desenvolverán obradoiros para rapaces de entre 4 e 9 anos.
Tamén haberá un espazo de pesca inuit para pequenos de entre 3 e 12 anos e un gran iceberg, un tobogán xigante inchable de cinco metros de altura para nenos de 4 a 12 anos dende o que os participantes caerán nunha piscina de bolas. Na actividade Expedición Polar a rapazada de entre 5 e 12 anos desenvolverá obradoiros sobre o Polo Norte e sobre como salvalo e haberá dúas actuacións especiais: unha de maxia e outra de contacontos. Outro dos atractivos será a tirolina ártica de 150 metros destinada a rapaces de entre 5 e 14 anos (sempre e cando o arnés se axuste correctamente), que permanecerá aberta entre o 20 de decembro e o 3 de xaneiro.
O sábado 28 levaranse a Monte Porreiro no mesmo horario (se chove faranse no Centro Sociocultural) e o domingo 29 estarán no Burgo (na Praza de Pasarón ou no Centro Sociocultural de Lérez).
A entrada ás actividades será de balde presentando tickets de compra de establecementos pontevedreses.