A Praza da Ferrería volveuse encher na terceira xornada do Festival Internacional de Jazz e Blues de Pontevedra, grazas á exquisita interpretación de Andrea Motis e a súa banda.
A catalá de éxito internacional comezou o concerto cun ton tranquilo, pero con moita personalidade e aproveitou, ao finalizar as primeiras pezas, para a dar as grazas á organización do festival, ademais de loar as vistas da praza e das súas xentes. "Ojalá pudierais ver desde aquí arriba la postal tan bonita que veo yo desde aquí. Con tanta acogida", dixo a artista, que recibiu calurosos aplausos e ovacións en cada unha das súas interpretacións.
Motis estivo acompañada por Christoph Mallinger no violín, mandolina e guitarra; Arecio Smith nos teclados, Steph Kondert no baixo eléctrico e Juan Rodríguez Berbín na batería.
Todos xuntos conseguiron non só encher a praza principal de Pontevedra, senón que tamén conquistaron os corazóns dos pontevedreses de todas as idades, nunha noite estival acolledora polas temperaturas e o bo ambiente que non deixou indiferente a ningúen que pasase pola zona.
LONGA TRAXECTORIA. Para Andrea Motis os anos de pandemia foron fructíferos e no 2021 sacou o seu
terceiro disco,
Colors & Shadows, e un disco autoeditado en 2022,
Loopholes, que aproveitou para presentar no concerto de onte e co que -grazas ás mesturas de sintetizadores e percusión máis forte- foi capaz de emitir sensacións de paz, calma e certa travesura aos espectadores, que non retiraron a vista nin ningún dos sentidos do espectáculo -excepto para aplaudir-. Con este último proxecto, a artista indicou que saíu dos ritmos máis básicos do jazz para atreverse con
ritmos máis funk.
En Colors & Shadows, a catalana alíase coa WDR Big Band, unha agrupación alemá que figura entre as máis solventes e versátiles de Europa, para facer unha composición de finísimos e lustrosos arranxos de sons que demostran os anos de experiencia desta cantante, compositora, trompetista e saxofonista.
Ida Nielsen, cuxo estilo oscila entre o rhythm and blues moderno, o soul, o funk ou o hip hop, soará este sábado na Ferrería
Motis comeza a súa formación aos sete anos de idade, na Escola de Música de Sant Andreu (Barcelona). Xa con doce, protagonizou o filme documental A film about kids and music e con 16 anos foi convidada por Quincy Jones -o director, arreglista e produtor dos traballos máis exitosos de Michael Jackson- e artistas de renome como Yo-Yo Ma, con quen interpretou a dúo no seu último álbum El cant dels ocells, unha das composicións máis recoñecidas do músico catalán Pau Casals. Ademais, neste incrible currículum engádense os certames e escenarios máis significativos do jazz mundial.
Coa actuación de Andrea Motis comezaron os días máis grandes do festival pontevedrés, a cuxo escenario se sobe este sábado Ida Nielsen e mañá Samantha Fish.
