"As persoas maiores somos a forza construtora do pasado, do presente e do futuro ao mesmo tempo que fomos as persoas xeradoras da maioría dos dereitos que hoxe mesmo desfrutamos". Con este recordatorio comenzou o manifesto das persoas maiores de Pontevedra, que este sábado celebraron o seu día dentro das I Xornadas de Interacción Social das Persoas Maiores.
Pronunciaron o manifesto Conchi Mumary e José María Fernández, integrantes da Asociación do Alumnado e Exalumnado Sénior do Campus despois dun pasarrúas que percorreu boa parte do casco antigo a cargo dos 40 integrantes de Mais Cantos e do músico Nelson Quinteiro, que tamén actuaron na praza da Verdura, onde tamén se leu o manifesto nun acto ao que tamén acudiu o edil de Benestar Social, Marcos Rey.
"Queremos celebrar esta fase da vida, vivir na dignidade e na igualdade de dereitos. Queremos respecto (..) e ver a xubilación como unha nova fase e unha oportunidade". Os maiores reivindicáronse como persoas capaces e dispostas a adaptarse á nova sociedade e a transmitir as súas experiencias e coñecementos ás novas xeracións, "mellorando as relacións interxeracionais e sendo o pegamento e alicerce da cohesión familiar".
DEPENDENCIA. Queren "que se nos teña en conta, estimular todos os resortes que eviten a nosa dependencia" e tamén "que ninguén quede excluído por ser muller; por ser do rural, por ter unha discapacidade ou por vivir na periferia".
Por iso, subliñan, "é a obriga das administracións poñer recursos a disposición das persoas maiores e de prepararse para a sociedade que imos ser (...). Precisamos recursos económicos, sociais e infraestruturas destinadas a fomentar o envellecemento activo de cara a mellorar a nosa calidade de vida. Debemos percibir pensións que garantan a nosa dignidade, autonomía e vida plena: servizos sanitarios e sanidade pública que acompañen no noso devir", subliñan.
Servizos sociais, acompañamento, prazas de residencia e de axuda "á altura das necesidades reais". Tamén puxeron énfase na interacción social. "As relacións sociais diminúen o sentimento de soidade e son un factor importante xa que non só melloran a calidade de vida, senón que tamén inflúen nunha maior lonxevidade. En Pontevedra sabémolo ben", aínda que, apuntan, queda moito por facer.
