Un total de 205 centros educativos da provincia, 16 deles do concello de Pontevedra, foron admitidos na Iniciativa ARCO 2020-2021, o programa de apoio, reforzo de competencias e orientación, segundo a resolución publicada na web da Consellería de Educación este venres.
A iniciativa, dirixida a alumnado matriculado en centros docentes públicos, consta de tres liñas que desenvolverán axustes educativos dentro da aula ordinaria, co obxecto de favorecer a súa participación no grupo-clase e a consecución do máximo desenvolvemento emocional, intelectual, social e profesional de todo o alumnado.
A Liña 1 está dirixida a alumnado de 4º, 5º e 6º de Primaria, a Liña 2, a alumnado de 1º de ESO e a Liña 3 a estudantado de 4º da ESO. Esta iniciativa será financiada polo Ministerio de Educación e Formación Profesional e cofinanciada polo Programa Operativo de Emprego, Formación e Educación FSE Galicia 2014-2020.
Os colexios de Pontevedra admitidos na Liña 1 son os CEIP de Parada-Campañó, A Xunqueira I, San Benito de Lérez, Vilaverde-Mourente, Manuel Vidal Portela, Froebel, San Martiño, Praza de Barcelos, Cabanas e Santo André de Xeve, así como os CEP Marcos da Portela e Campolongo. En canto aos institutos, desenvolverán esta iniciativa nas liñas 2 e 3 os IES A Xunqueira I e II e o Frei Martín Sarmiento, mentres o IES Luís Seoane o fará só na Liña 2.
Así mesmo, tamén están incluidos centros educativos da área de influencia da capital, como tres colexios de Marín (Ardán, Laxe e Sequelo), os CEIP Isidora Riestra e Lourido, de Poio, así como o propio IES de Poio (nas liñas 2 e 3).
Outros centros da comarca son o CEIP Manuel Cordo Boullosa, de Ponte Caldelas, os colexios de Riomaior e O Toural (Vilaboa), o IES de Cotobade, ou os sanxenxinos CEIP Portonovo, Nantes e A Florida e o IES de Sanxenxo.
Así mesmo, figuran na resolución o CEIP Manuel Padín Truiteiro e o IES de Soutomaior e, pola beira do Umia, os CPI Don Aurelio de Cuntis, Santa Lucía de Moraña e Alfonso VII de Caldas, así como o CEIP Amor Ruibal de Barro.
