A Concellería de Desenvolvemento Sostible e Medio Natural, que dirixe o socialista Iván Puentes, puxo este luns en marcha as obras que permitirán renovar paisaxisticamente a zona verde do Campo da Torre, no barrio de San Roque, e dotala dun moderno e fastuoso parque infantil no que terán protagonismo as árbores e outros elementos naturais. As actuacións, adxudicadas á empresa Zona de Obra O Rosal SL cun orzamento de máis de 76.000 euros, ten un prazo de execución duns tres meses e suporá un cambio radical de imaxe deste espazo de centralidade do barrio, ao incorporar amplas áreas de xogo, sombra, encontro social e descanso, coa instalación de hamacas e cadeiras de madeira, así como puntos de carga para dispositivos móbiles.
O proxecto, deseñado polo arquitecto Víctor Hermo, que tamén contempla a renovación da fonte existente coa creación de pequenas canles de auga arredor da mesma, ten entre as súas características máis chamativas a incorporación de varias estruturas de trepa e de numerosos troncos de madeira de diferentes alturas, cuxa distribución evoca visualmente ás columnas de basalto de orixe volcánica que caracterizan á famosa paisaxe do Giant’s Causeway (Calzada do Xigante) de Irlanda do Norte.
O comezo dos traballos foi supervisado esta mañá por Iván Puentes, nunha visita na que estivo acompañado polo xefe do Servizo de Parques e Xardíns, Manuel Fontán. Tal e como subliñou o portavoz municipal do PSOE, "este proxecto busca converter o Campo da Torre nun espazo accesible, de saúde, benestar, socialización e encontro cos demais, no que nenos e nenas de tódalas idades e habilidades gocen do xogo e que, ao mesmo tempo, resulte cómodo e atractivo para os adultos acompañantes". "A oferta presentada pola empresa adxudicataria incluíu melloras por valor de máis de 12.500 euros, que abranguen a colocación de tumbonas de madeira, papeleiras, puntos de recarga e xardineiras", sinalou Puentes.
Segundo apuntou, "trátase dun proxecto único e exemplar nesta cidade, porque imos facer unha zona de lecer infantil absolutamente diferente a tódalas que temos en Pontevedra, xa que non vai ser un parque de catálogo que poidamos atopar en calquera outro sitio, senón especificamente deseñado para este espazo, con xogos inclusivos e de creatividade que tamén atraerán a nenos e nenas de fóra do barrio; e porque se plantexou cunha filosofía e cun concepto de reutilización, dentro desa economía circular da que sempre falamos: salvo os vellos xogos do parque infantil, ningún dos elementos estruturais desta praza vai ser destruído e integraranse nun novo deseño radicalmente diferente". "Isto que a día de hoxe é unha illa rodeada de coches por tódalas súas partes –engadiu o socialista–, transformarase nunha península, ao incorporar, ao gañar, ese pequeno cachiño de rúa que dá contra a Praza de Touros, absolutamente prescindible desde o punto de vista do tráfico rodado".
