Reigosa inclúe a dous docentes de Pontevedra na súa candidatura á Reitoría

Seis mulleres e seis homes forman o equipo

Reigosa, de pé, co equipo co que concorrerá ás eleccións. DUVI
photo_camera Reigosa, de pé, co equipo co que concorrerá ás eleccións. DUVI

Seis mulleres e seis homes integran a candidatura que encabeza Pachi Reigosa á fronte do equipo H2040 cara ás eleccións a reitor que se celebrarán o vindeiro 23 de abril.

O campus de Vigo estaría representado con seis vicerreitorías; Ourense con outras tres e Pontevedra con dúas. A Secretaría Xeral estaría ocupada polo profesor titular da Área de Dereito Internacional Privado Miguel Ángel Michinel Álvarez. Pola súa banda, Jorge Soto Carballo, profesor contratado doutor do Departamento de Análise e Intervención Psicosocioeducativa, ocuparía o cargo de vicerreitor do campus de Pontevedra e María Esther de Blas Varela profesora a Facultade de Ciencias, sería a súa homóloga no campus de Ourense.

Soto Carballo desenvolve o seu labor na Facultade de Ciencias da Educación e do Deporte, na área de Teoría e Historia da Educación. Doutor en Ciencias da Educación e integrante do grupo GIES-10 centra o seu labor investigador nas áreas de formación do profesorado, saúde e educación e pedagoxía dos valores. Así mesmo foi un dos dez finalistas nos premios Educa Abanca 2017 ao mellor docente de España na categoría de universidades.

A outra representante do campus de Pontevedra é Mónica Valderrama Santomé. Profesora contratada doutora do Departamento de Comunicación Audiovisual e Publicidade, é docente na Facultade de CC SS e da Comunicación, onde coordina o Máster de Dirección de Arte Publicitaria. Doutora en Publicidade e RRPP, as súas liñas de investigación céntranse nas tendencias creativas en medios audiovisuais emerxentes, nos novos formatos publicitarios audiovisuais ou nas novas tecnoloxías aplicadas á comunicación.

Comentarios