A Asociación de Autónomos e Pequenas Empresas de Galicia (APE) celebrou este luns o primeiro dos encontros dixitais organizados no marco do proxecto Reinicia Pontevedra (#PonteLoversPemes), impulsado pola plataforma #PonteLovers para autónomos e pemes, coa financiación da Concellería de Promoción Económica e Turismo. Esta sesión inaugural contou coa participación de 25 negocios, dos sectores da moda, a publicidade, o turismo, a hostalería, os ximnasios, a formación e a alimentación.
O título da primeira sesión foi O novo cliente, recuperar e medrar. Os asistentes xeraron un coloquio sobre a oportunidade de recibir aos clientes con empatía nestas primeiras semanas tralo confinamento.
O vindeiro xoves 14 de maio, ás 15.30 horas, terá lugar o segundo encontro, centrado nos valores que resultaron reforzados durante esta crise: a solidariedade e a necesidade de xerar confianza e de seren sostibles. Características que os clientes van pedir cada vez máis ás empresas. Os asistentes coincidiron en que o momento económico é de grande incerteza.
Impartiu a sesión Miguel Ángel Souto Fraga, director da Consultora Cimak (de vendas e márketing en Pontevedra), e experto formador en empresas.
As temáticas do resto dos encontros serán transversais e multisectorais: cambio de valores, técnicas de venda, novo servizo ao cliente, tendencias en publicidade e márketing... Todo isto, nos ámbitos físico e dixital, segundo o demande o cliente.
As inscricións para estes encontros son gratuítas e poderán formalizarse enviando un correo a [email protected] ou chamando ao teléfono 697 195 540.
