A Xunta completou os trámites para que o río Gafos se converta no cuarto espazo natural de interese local (Enill) de Galicia. Esta figura de protección suporá para o Concello de Pontevedra, promotor da solicitude e responsable da súa xestión, asumir o compromiso de poñer en práctica todas as medidas necesarias para garantir a conservación dos valores naturais que representa, segundo informou o Goberno galego este xoves tras a súa reunión semanal.
A declaración tamén lle dará preferencia ao Concello no acceso e obtención de axudas destinadas a garantir a súa preservación e mellorar a xestión desta zona.
O Consello da Xunta deulle este xoves o visto e prace ao proxecto de decreto polo que se aproba o Plan de conservación do Enil Río Gafos, un documento imprescindible para poder obter a declaración definitiva para que o Concello xestione este espazo por un período inicial de 10 anos.
Neste plan establécense as bases técnicas para garantir a conservación das especies e hábitats presentes no río Gafos, valores que xustificaron precisamente a súa declaración como Enil. Tamén recolle unha serie de medidas orientadas á recuperación progresiva do ecosistema fluvial cun importe total previsto de 230.000 euros, que achegará o Concello de Pontevedra, como promotor e xestor deste espazo, e que se investirán principalmente en mellorar a calidade da rede de sumidoiros no río e do ecosistema fluvial.