Roque deulle a benvida aos nenos. O personaxe da compañía de teatro Baobab foi o encargado de recibir este venres, no Teatro Principal, aos bebés e os cativiños que enchían o patio de butacas. Eles son o público específico ao que vai dirixido o Festival das Núbebes e por iso tamén subiron rapidamente ao escenario. Tiñan que ser protagonistas de verdade.
A terceira edición do evento quedou inaugurada cun espectáculo no que, ademais de Roque, participaron Beatriz Campos, La Flauta Mágica e Marcelo Dobode, e que mesturaba teatro, monicreques, contos e música. Tamén participou a concelleira de Benestar Social, Carme Fouces, e puido verse un vídeo resumo do festival do ano pasado.
Dende este momento e durante dúas fins de semana consecutivas, a programación deste festival para bebés ocupará distintos espazos de Pontevedra: o Principal, a Casa Azul e a Casa das Campás fundamentalmente. Migallas, Arantza Alfaia, Titereficciós, La Flauta Mágica, Ana Seoane, Sara Rodríguez, Caramuxo, Sonia Carbón, Larpeiras, Pavís Pavós, Tetameiga, María Fumaça e Begoña Paz son algúns dos protagonistas dun ciclo que nas súas edicións anteriores non deu atendido a demanda do público e que este ano ampliou o número de funcións para intentar darlle cabida a máis espectadores.
Teatro, contos, danza e ata unha guerra de almofadas compoñen a programación, que tamén inclúe obradoiros dirixidos a profesionais do eido infantil.
A programación completa do festival, así como os horarios e as normas de recollida de entradas, poden consultarse en www.pontevedra.eu/cultura.
