O Concello de Pontevedra instalará, finalmente, 212 illas de reciclaxe en todo o rural pontevedrés.
A previsión inicial da concellaría responsable da xestión de residuos, que dirixe Carme da Silva, era colocar 175 illas, o que suporía incrementar as actuais, que son 56. Pero "logo de estudar a poboación de cada parroquia, a súa dispersión e os espazos físicos onde colocar os colectores, seguindo a premisa de manter unha illa de reciclaxe por cada 150 habitantes, considerou posible a instalación de 212 illas", informou o Concello a través dun comunicado.
Ademais, a empresa concesionaria do servizo, Ferrovial, continúa a instalar colectores de vidro e envases en toda a cidade, "aínda que a menos ritmo do desexado", segundo indicou a concelleira Carme da Silva. O Concello prevé que o despregue estea rematado no mes de xaneiro.