Acabouse o que se daba. A XXII edición do Salón Internacional do Libro Infantil e Xuvenil baixou este domingo o pano. Fíxoo logo de organizar máis de 300 actividades durante dúas semanas e tres fins de semana.
O Salón Emerxencia literaria pasará a historia por ser o que levou fóra das paredes do Pazo da Cultura os obradoiros e contacontos, incorporando espazos como a Illa do Covo ou as parroquias ás que chegou da man do Rodalibros. Tamén será recordado por plantarlle cara á crise sanitaria cun estrito protocolo de seguridade que, malia que obrigou a reducir aforos, trouxo de volta a ilusión a Pontevedra. "O Salón do Libro non tería sido posible sen a colaboración absoluta de todo o público que se comportou de maneira exemplar, e a implicación das Escolas Unesco - 80 escolas de 15 países - e os centros escolares da cidade e contorna - más de 30 - que pese ao curso complicado quixeron participar cos seus traballos e recibiron de bo grado as actividades que lles levamos, preto 150", destacou o domingo a concelleira de Cultura, Carme Fouces, trala clausura do evento.
Roteiros, contacontos, obradoiros, espazos para a reflexión, actuacións musicais e estreas foron algunhas das actividades que durante dúas semanas e tres fins de semana encheron de actividade a Boa Vila. Case sempre con aforo completo. "E todo isto con ilusión e responsabilidade", destacaron nun acto de clausura especialmente emotivo "xa que o ano pasado non se puido celebrar", lembraron os presentadores. Na clausura repasáronse as actividades que se levaron a cabo durante estes días e incluso houbo un momento para lembrar a vacinación de Orbil, a mascota do Salón.
A XXII do Salón incorporou espazos como a Illa do Covo e o préstamos de libros, chegando a prestar 200 durante estas semanas
Aínda que o Salón apostou principalmente pola presencialidade, simultaneando actividades en diferentes espazos, contou con varias actividades en streaming como os contacontos matinais, os actos de inauguración, homenaxe e clausura e os faladoiros creativo - literarios e o III Congreso Internacional de Mediación Lectora, en colaboración coa Uvigo, que chegou a máis de 150 persoas.
Non faltou tampouco nesta edición a tecnoloxía da man da colaboración do Museo do Videoxogo de Cangas e tivo cabida a ciencia, de especial relevancia por mor da situación actual. Tamén se prestaron 200 libros ó abeiro desta iniciativa. Non faltaron tampouco os obradoiros gastronómicos Ecomerendas nin os roteiros ambientais entre moitas sorpresas máis.
"Foi un Salón do Libro moi difícil pero moi exitoso", subliñou Carmen Fouces. "Quero felicitar ó equipo do Salón do Libro polo traballo inmenso que fixo para que o domingo esteamos clausurando a XXII edición. Parece incrible que puideramos facer isto en plena pandemia", engadiu a edil de Cultura que anunciou que "xa imos camiño da edición número 23", concluíu.
