Samaín por San Patricio. É o cambio que propón o Mareantes Rugby Club que, despois de dous anos sen poder celebrar a xa típica festa irlandesa na Praza de España, neste 2021 aposta polo Samaín Fest para recuperar a actividade.
A pandemia supuxo para a entidade un considerable impacto económico, xa que boa parte do seu orzamento completábase coas achegas obtidas a través deste evento. Agora que a situación epidemiolóxica mudou e que a emerxencia sanitaria decaeu en Galicia, o club pontevedrés decidiu aproveitar as datas de Todos os Santos para mergullarse de cheo no Samaín Fest, un festival organizado coa colaboración da Concellería de Promoción Económica e Turismo que animará esta ponte de Defuntos con música en directo e unha variada oferta gastronómica, na que tamén estará presente a cervexa: rubia, tostada e a clásica Guinness negra.
Un dos principais atractivos desta festa, que se desenvolverá na Praza de España entre o mércores 27 de outubro e o luns 1 de novembro, serán os concertos diarios protagonizados por grupos locais. "Nun ano no que a cultura o pasou tan mal resulta especialmente importante botarlles unha man, potencialos e axudarlles a que teñan actividade e a que a xente escoite a súa música. Ao tempo que se recadan fondos imprescindibles para un club tan senlleiro como o Mareantes, o evento é un grande exemplo de compromiso co talento local e a cultura desta cidade. Mesmo o orixinal cartel do festival foi elaborado por un artista local como o pintor, debuxante e caricaturista Rafa Prieto".
O programa de actividades comprende concertos ao longo de todas as xornadas de festival, así como a posibilidade de realizar unha sesión vermú patrocinada por Cinzano. A festa pecharase o luns, 1 de novembro, ás 18.00 horas.
Tal e como subliña o presidente do Mareantes, Roberto Juncal, "este Samaín Fest resulta esencial para o club", que o organiza "co obxectivo de financiar os gastos da tempada e, sobre todo, o noso ilusionante proxecto de escolas de categorías inferiores, no que estamos cen por cen volcados, que xa conta cuns 50 rapaces e do que vai depender o futuro e viabilidade do equipo a medio e longo prazo".
Pola súa banda, a vicepresidenta do club de rugby, Rebeca González, anima "a todos os pontevedreses a que se acheguen nesas datas ata a Praza de España para desfrutar dun festival que se levará a cabo coas máis estritas medidas de seguridade".
Non obstante, Blanco considera que "este Samaín Fest é un deses síntomas de normalidade que nos enche de ledicia ver nas rúas".