Nese curso Ignacio rematou 4º da Eso cunha media de 9,98 sobre 10 e nos exames realizados o pasado 9 de setembro, aos que se presentaran preto de 650 estudantes de toda Galicia, logrou a cuarta millor nota: 55,6 puntos sobre 60, apenas seis décimas por debaixo da máxima cualificación.
O listado dos premiados pode consultarse no Diario Oficial de Galicia
O mozo, que atesoura un brillante curriculum desde os seus tempos de escolar no CEIP Álvarez Limeses, conta que decidiu presentarse a esta proba porque cumpría os requisitos da nota e "non tiña nada que perder", pero tomouno dun xeito "máis relaxado" que os exames do curso. "Repasei un pouco os contidos desde unhas semanas antes, sen presión".
Nestas probas acadou dous 10, en Inglés e Matemáticas; un 9,3 na materia opcional (Físca e Química); un 9,2 en Xeografía e Hostoria; un 8,8 en Lingua Castelá e un 8,3 en Lingua Galega. "Non esperaba esta nota. Foi unha gran sorpresa porque non lle dediquei tanto tempo. Un pouco casualidade, un pouco sorte" e o bo tino de "deixar algúns exercicios nos que non estaba tan seguro".
Centrado na modalidade de Ciencias ("gústanme, sobre todo as Ciencias Exactas"), o seu obxectivo é matricularse na Universidade en Matemáticas ou Física, ou quizais un dobre grao, "a ser posible nunha Universidade galega". De momento, aínda lle quedan case dous cursos. En 1º de Bacharelato "aínda non notei moito cambio" respecto á Eso "como me din outros compañeiros" e "penso que se continúo así irame ben", pero, admite, "hai que pórse as pilas, porque agora a nota si conta para o exame da Abau, hai que mirar cara ao futuro".
O segredo para lograr unhas notas tan brillantes, explica, "creo que está en organizarse ben e botarlle un pouco de esforzo, levalo todo ao día, porque aínda que non teñas moi boa capacidade de concentración ou memorización, si que é posible levar a cabo bos exames e facer un bo traballo se o levas organizado ao día". Por iso considera "fundamental" facer un plan con todas as materias de estudo e o tempo que se lles precisa dedicar, "se es un pouco previsor ou previsora".
Esa organización tan medida e que tan bos resultados académicos lle dá, Ignacio reserva tempo para outras actividades, desde xogar ao bádminton a estudar Inglés na Escola Oficial de Idiomas. "De momento podo asistir a todos os entrenos e clases, pero si é certo que algunha semana con máis presión de exames teño que faltar a algunha sesión".
Non só iso, senón que tampouco renuncia a saír cos amigos, "aínda que non tanto como me gustaría; nunca en épocas de exames, pero si en vacacións e a principio e final de curso". Tamén lle gusta ler "fantasía e ciencia ficción", a música rock e "calquera tipo de cultura accesible, que é unha experiencia máis. Aprender todo o posible é a clave do coñecemento".
No curso pasado, lembra, "foi complicado ao comezo adaptarse á nova situación sanitaria e foi un pouco difícil compaxinar as clases co deporte. As clases tamén foron algo duras, non só pola máscara, que ás veces complica escoitar ao profesor, senón polo ambiente tristeiro... Pero o único que podes facer é levalo o mellor posible".