O Castelo de Soutomaior acolleu este xoves a entrega dos Premios Lois Peña Novo, que recoñecen o labor de persoas públicas que traballan a prol da difusión e normalización da lingua galega. Nesta edición foron galardoados a escritora María Xosé Queizán, o filólogo Manuel González e o xurista Xesús Costas Abreu.
María Xosé Queizán é unha recoñecida autora en lingua galega con máis de 60 anos de traxectoria como escritora de teatro, novela, ensaio e poesía. Asinou novelas como A orella no buraco ou Amor de tango e é unha das pioneiras do movemento feminista en Galicia. Deste xeito, defende a loita contra a colonización sexual das mulleres e reivindica a razón como arma contra o machismo e a favor da liberdade. O xurado destacou o compromiso coa lingua da autora dende os anos 50 e en diferentes eidos, dende a literatura ao ensino, o que a converte nunha polígrafa da cultura galega.
Manuel González é catedrático de Filoloxía Románica da Universidade de Santiago de Compostela, coordinador do Seminario de Lexicografía da Real Academia Galega, coordinador científico do Centro Ramón Piñeiro para a Investigación en Humanidades e presidente da Asociación PuntoGal. O xurado recoñece con este galardón "o seu traballo de investigación científica e as súas constantes achegas á riqueza do noso idioma".
A administración pública ten responsabilidades ineludibles coa lingua e coa súa recuperación
De Xesús Costas Abreu o xurado premiou o seu compromiso coa defensa da lingua galega no ámbito da Administración local na que desenvolve o seu traballo. En concreto, exerce como asesor xurídico do Concello de Vigo. Tamén se implicou na fixación dunha linguaxe xurídica e na promoción da lingua no eido administrativo, que o levaron á creación de manuais de documentación para uso dos funcionarios ou a formar parte da sección de lingua no Consello da Cultura Galega e colaborar dunha maneira activa en iniciativas a prol da normalización lingüística.
OS PREMIOS. Os Premios Lois Peña Novo cumpren con esta vintecatro edicións recoñecendo o labor individual e colectivo de persoas, entidades e empresas que traballan ou teñen relación coas administracións públicas. Deste xeito, co seu labor contribúen a que a lingua se consolide nas ditas Administracións. "A administración pública ten responsabilidades ineludibles coa lingua e coa súa recuperación. Os funcionarios e funcionarias públicos temos o deber de cumprir e facer cumprir a legalidade vixente, coa utilización do galego incluso podemos dicir que un funcionario, que é un servidor público, axuda a promover o uso do galego na cidadanía", explica a Fundación Lois Peña Novo na súa páxina web.
A finalidade é seguir o exemplo do home que da nome ao galardón, un funcionario que defendeu o uso do galego na Administración. Así, adicou a súa vida ao estudo dos problemas de Galicia no primeiro tercio do século XX e loitou pola autonomía de Galicia. Do mesmo xeito, foi un dos impulsores das Irmandades da Fala.
