Este mércores comezou a repartición de máscaras hixiénicas correspondente a un novo envío realizado polo Goberno de España. Desta forma, a subdelegada do Goberno en Pontevedra coordinou esta terceira repartición a diferentes colectivos e entidades da provincia para garantir o uso obrigatorio deste material de seguridade individual cando non se poida respectar a distancia física entre as persoas.
O montante de máscaras ascende, nesta ocasión, a 60.000 unidades que serán distribuídas desde a Subdelegación do Goberno. En concreto, a repartición esténdese novamente a entidades sociais como son o Comité Provincial de Cruz Vermella, Cáritas, para as súas sedes de Tui-Vigo e O Salnés e para o Comité de Entidades Representantes de Persoas con Discapacidade (Cermi), que serán os encargados de facer chegar o material sanitario aos seus asociados como Cogami, Once, Aspace, Down, e Fagal, entre outras.
Cada unha destas entidades recibirán unhas 20.000 máscaras para que poida chegar a todos os colectivos que a conforman.
Con esta nova entrega, a Subdelegación fixo chegar máis de 100.000 máscaras a estas organizacións e a outros colectivos como bancos de alimentos e asociacións sociais "para garantir, especialmente, que chegase este equipamento sanitario a todos os colectivos e, especialmente, a aqueles relacionados con persoas que poidan ter unha maior limitación de compra pola súa situación máis desfavorecida", recalcou a subdelegada, Maica Larriba.
Ademais, lembrou que "esta nova entrega de material sanitario por parte do Goberno, súmase ás máis de 560.000 que foron repartidas na provincia de Pontevedra desde o 13 de abril para cubrir as necesidades da poboación no retorno á actividades de acordo ás diferentes fases de desconfinamiento que estamos a levar a cabo". Tamén resaltou a importancia de seguir o protocolo sanitario esixido en cada momento, tanto a nivel de distancia social como a hixienización frecuente de mans, medidas que, precisou, "reducen ao mínimo as posibilidades de contaxio".
A subdelegada do Goberno en Pontevedra agradeceu á cidadanía o seu comportamento en cada unha das fases de desescalada "para que entre todos superemos esta pandemia cara a unha nova normalidade, á que temos que chegar máis fortes para seguir traballando pola nosa provincia".
