O Día Mundial da Auga non pasou desapercibido en Pontevedra, sobre todo para os 85 estudantes dos clubs Contra o Cambio Climático dos IES Frei Martín Sarmiento (60) e Sánchez Cantón (75), que este martes participaron nunha actividade xunto á asociación Vaipolorío. Eles son a Tropa do Clima.
Unhas charlas divulgativas impartidas polo concelleiro de Desenvolvemento Sostible e Medio Natural, Iván Puentes, e o presidente da citada asociación ecoloxista, Gonzalo Sancho, serviron para conmemorar esta efemérides, co propósito de concienciar acerca a crise mundial da auga e a necesidade de adoptar medidas que permitan alcanzar o Obxectivo de Desenvolvemento Sostible nº6: Auga e saneamento para todos antes de 2030.
A segunda parte foi unha xornada de limpeza en diferentes treitos do río dos Gafos. Baixo a tutela dos profesores Manuel Fariña e Beatriz Trillo, as actividades incluíron a gravación dun vídeo reportaxe e a realización de fotografía artística por parte dos estudantes e, así, puxeron os alicerces da rede municipal de loita contra o cambio climático que Puentes quere impulsar desde o Concello baixo o nome da Tropa do Clima.
O edil de Desenvolvemento Sostible quere impulsar a Tropa do Clima para implicar á rapazada dos institutos da cidade
"Consiste en implicar á rapazada dos institutos da cidade en dúas cuestións fundamentais: a primeira, seguindo o exemplo do Sánchez Cantón e do Frei Martín Sarmiento, en crear nos seus centros os clubs Contra o Cambio Climático, de xeito que poidan realizar accións concretas nos seus centros; e a segunda, que con ese paraugas da Tropa do Clima poidan colabora ao longo do ano en saídas que organicemos a espazos naturais do concello para efectuar intervencións sobre o terreo –sinalou o edil–. A loita contra o cambio climático implícanos a todos e temos que comezar a preocuparnos do que temos máis preto".
Neste 2022, o foco do Día Mundial da Auga centrouse nas augas soterradas e no impacto destas sobre os ríos e sobre o cambio climático. Nas tarefas de limpeza do Gafos participaron uns 60 alumnos e alumnas do IES Frei Martín Sarmiento e uns 25 do IES Sánchez Cantón, todos eles membros activos dos clubes Contra o Cambio Climático implementados nestes centros educativos. Os equipos de limpeza dividíndose en tres brigadas dotadas de sacos de lixo, luvas e pértegas de recollida que actuaron na desembocadura do río, o treito que discorre pola rúa María Victoria Moreno e o paseo dos Gafos, respectivamente.
O alumnado de 1º de Bacharelato de Artes foi o encargado de elaborar un vídeo reportaxe documental da limpeza (como proxecto de aula da materia de Imaxe e Son), mentres que o de 3º e 4º da ESO realizou fotografía documental e artística (dentro do proxecto educativo Fotografía en Curso).
