SAÍR Ó monte na procura de cogomelos é unha actividade das poucas que aínda non levou por diante a covid-19. Deste xeito foron moitas as persoas que nas primeiras fins de semana do outono se lanzaron para percorrer as fragas da comarca na busca dos fungos comestibles, auténtico manxar para o padal. E é que a contorna das Rías Baixas abeira numerosos espazos verdes ricos na presenza de cogomelos.
Soutos e carballeiras en setembro e outubro, piñeirais en novembro e eucaliptais en decembro e xaneiro son os lugares e tempos idóneos segundo os expertos da agrupación micolóxica de Pontevedra Brincabois para saír a polos cogomelos.
"Recolléronse moitos boletus, pero algunhas especies aínda están a saír"
IDENTIFICACIÓN. Entre as principais recomendacións, o presidente desta asociación, Jaime Bernardo Blanco, destaca a importancia da identificación do tipo de fungo que atopado. "Ante todo recomendamos prudencia, se apañamos algún cogomelo para comer temos que ter moi claro que estea ben identificado e non aventurarse porque as consecuencias poden ser nefastas", di o responsable deste colectivo que explica que tamén a crise sanitaria obrigou a reducir a actividade de Brincabois.
O que si vén de activar é o seu servizo de identificación en Pontevedra. "Decidimos reducir as nosas actividades para o público de Pontevedra ao servizo de identificación de cogomelos dos luns e os mércores micolóxicos", indica. Así, malia que polo de agora non se levarán a cabo xornadas formativas, os expertos micólogos agardarán todos os luns no bodegón Arca (rúa Álvarez Limeses) e os mércores no bar La Reina del Raxo, en Mourente, na rotonda do cruce ao hospital. "Estaremos dende o luns 19 de outubro ata o 21 de decembro e dende o mércores 21 de outubro ata o mércores 23 de decembro, respectivamente, dende as 20.30 ata as 22.30 horas", engade Blanco Dios.
![Jaime Blanco (esquerda), este luns no bodegón Arca. RAFA FARIÑA]()
Jaime Blanco (esquerda), este luns no bodegón Arca. RAFA FARIÑA
Nos primeiros días da estación da chuvia déronse ben os boletus e mailas cantarelas. "Algunhas aínda están empezando a saír, porque o frío que houbo hai un par de semanas e a falta de chuvia nalgún momento fan que aínda haxa algunhas especies", advirte o presidente da agrupación micolóxica de Pontevedra.
SAÍDAS DOS COLEXIOS. Outra iniciativa que se manterá malia a covid son as saídas cos escolares. Polo de agora Brincabois, a través do Concello e os colexios de Pontevedra, ten programadas un total de once saídas nas contornas dos distintos centros escolares. Van dirixidas a alumnos de entre cuarto e sexto de Primaria e inclúen unha pequena charla sobre as distintas especies de cogomelos e unha exposición cos distintos exemplares recollidos durante a saída.
Jaime Blanco lembra ademais que o mellor para recoller os cogomelos é empregar unha cesta de vimbio, no canto de bolsas de plástico ou outros recipientes, así como levar unha navalla ou coitelo para "collelas enteiras a fin de facilitar a identificación e non levar a confusión", subliña o micólogo de Brincabois.
