A UVigo estende a Pontevedra a Aula Confucio para impartir chinés

O Centro de Linguas da Universidade de Vigo estenderá no segundo cuadrimestre a Aula Confucio, que se estreou con éxito no campus central en 2018, a Ourense e Pontevedra. Deste xeito, a partir do 4 de febreiro empezarase a impartir un seminario de iniciación á lingua e á cultura chinesas, a cargo da profesora nativa Lili Wo. Previamente, impartiranse dous obradoiros gratuítos, un de caligrafía chinesa (14 de xaneiro) e outro de recortado de papel chinés (día 23). Todos eles están dirixidos tanto á comunidade universitaria como á poboación en xeral. Terán lugar na Escola de Enxeñería Forestal.

A xefa de estudos do Centro de Linguas, Mercedes Álvarez, explicou que se trata dunha decisión académica estratéxica. "Non é que houbera demanda en Pontevedra, pero quixemos estender o proxecto piloto iniciado en Vigo".

A UVigo asinou hai case un ano un convenio coa Universidad de León, onde ten a súa sede o Instituto Confucio, "una institución desde la que procuramos intensificar las relaciones entre España y China", segundo a súa páxina web, para crear a delegación galega. "A idea non é só ensinar a lingua, senón achegarnos á súa cultura –explica Álvarez–. Encárgannos actividades culturais como ciclos de cine e obradoiros e tamén estamos pensando en celebrar o aninovo chinés".

A acollida está a ser moi boa. Para o cursiño de caligrafía, cuxo prazo de matrícula remata este venres, hai sete persoas preinscritas, "as mesmas que había en Vigo no primeiro cuadrimestre pese á publicidade que se lle deu". Para o de recortado de papel apuntáronse outras nove.

Lili Wo é licenciada en Filoloxía Chinesa e Xaponesa e totalmente bilingüe en castelán e galego

O obradoiro de iniciación á cultura e á lingua chinesas consta de 40 horas e impartirase entre o 4 de febreiro e o 13 de maio durante as tardes dos luns. O seu prezo é de 156 euros para membros da comunidade universitaria e de 190 para o público en xeral. Para que se leve a cabo será necesario un mínimo de catro inscritos e un máximo de 20, todos eles maiores de 16 anos. O programa inclúe a introdución á fonética e escrita chinesas, nocións para desenvolverse en situacións comunicativas básicas (saúdar, nacionalidade, preguntas cotiás...) e elementos culturais como música, tradicións, comida, etcétera. O prazo de matrícula remata o 29 de xaneiro. A docente que o impartirá, Lili Wo, é licenciada en Filoloxía Chinesa e Xaponesa e totalmente bilingüe en castelán e galego, segundo destacou Mercedes Álvarez.

OUTROS IDIOMAS.  A esta oferta súmase, xa en Vigo, o curso cuadrimestral de lingua chinesa de nivel A1.2 que permite preparar o exame de acreditación de nivel oficial HSK1, que se realizará por primeira vez na Universidade de Vigo no mes de xuño.

No campus de Pontevedra o Centro de linguas tamén imparte os niveis de A2.2 e B1.2 de Inglés e Español para estranxeiros. En Vigo a oferta amplíase a outras linguas: Alemán, Francés, Italiano e Persa. Están abertos tanto á comunidade universitaria como ao público en xeral e as persoas interesadas teñen de prazo para matricularse no segundo trimestre ata o 20 de xaneiro, na web http://centrodelinguas.fundacionuvigo.es.

Nesta ocasión, a esta oferta súmase unha das principais novidades do cuadrimestre, o curso Hold on to your English!, dirixido a estudantes de nivel alto de inglés (C1 e C2) para manter e reforzar a súa competencia lingüística a través das catro destrezas. Están pensados, explica Mercedes Álvarez, "para estudantes que queiran presentar o seu TFG ou TFM nunha titulación que permite facelo neste idioma".

Ao longo deste mes terán lugar tamén os exames de acreditación de inglés Cartacles, que serán para o nivel B2 o 15 e para o B1 o 16 de xaneiro en cada un dos tres campus da UVigo.