Eran as 7.00 horas deste domingo cando nas inmediacións do poiense Bar Lourido detectaron a presenza dun verquido inusual nun dos condutos que desembocan no mar, e co que posteriormente se atoparon tamén os veciños e veciñas que saíron a camiñar polo paseo durante as primeiras horas do día. Ante o aspecto que presentaban as augas que saían de dito conduto, e que rápidamente foron identificadas a simple vista como augas fecais, os veciños decidiron dar aviso á Policía Local de Poio, que se presentou no lugar para dar conta da situación.
Cara o mediodía, o verquido xa formara unha mancha nas augas próximas á praia de Lourido, perceptible a simple vista, coa presenza de varios residuos coma toallas hixiénicas, restos de papel ou compresas que flotaban na auga. Foi entón cando se desprazou ata o lugar o patrón maior da cofradía San Telmo, César Rodríguez Piñeiro que, tras comprobar en primeira persoa a magnitude do verquido de fecais, mostrou a súa preocupación pola actividade do marisqueo da zona nos vindeiros días. "Un vertido así puede llegar a afectar algo a la almeja. Si no se trata de algo puntual y se produce con más frecuencia podrían cerrar la zona hasta que se solucione, tal y como pasó hace unos cuatro años", asegura. Para el, os diferentes verquidos que se producen nunha zona na que desembocan varios tubos, algúns deles de augas pluviais, xunto coa tubería que ocasionou o verquido, de maior tamaño, son sempre motivo de alarma. Sobre este último verquido, Rodríguez salientou que podería "tener consecuencias como la mortalidad de la almeja" a longo prazo. "Si dentro de un tiempo empieza a haber mortalidad y no se sabe por que, es posible que tenga relación con esto", afirma.
O patrón maior, que asegura descoñecer a procedencia de dito verquido, púxose en contacto tamén co Seprona, que comunicou que non tiña servizo nese momento, polo que quedou á espera de que este luns, co informe da Policía Local, o Seprona poida actuar para esclarecer as circunstancias do verquido, que a Asociación de Veciños de Lourido relacionou coa rotura dun bombeo de fecais, unha circunstancia que, segundo explica a presidenta, Josefa Moreira, xa se ten dado noutras ocasións, polo que tamén se procedeu a dar aviso a Viaqua. A pesar diso, durante a tarde de onte, a tubería aínda continuaba vertendo ao mar.