Recoñecida como Vila das Artes, a cidade fronteiriza de Vila Nova de Cerveira adoita ofrecer cada ano unha programación estival de calidade, na que a música xoga un papel fundamental. Con todo, por mor da presenza da covid, a Cámara Municipal cerveirense decidiu suspender os grandes eventos que adoitaban congregar a grandes masas de poboación, tanto local como visitante.
Perdéronse así os habituais concertos de verán, tanto acústicos como de fado, ao igual que outras iniciativas musicais que poñen en valor a tradición.
Secasí, o casco histórico volve sorprender coa súa particular decoración estival da vía pública grazas ao proxecto comunitario O Crochet Sai à Rua... em Cerveira, que neste ano 2020 propón un "himno á arte da música", mediante a exposión de pezas de gancho a tamaño real ou de entre 3 e 6 metros, de temática musical.
O roteiro comeza ás portas do edificio da Cámara Municipal, onde se atopa un te piano forrado de gancho e acompañado por un pianista do mesmo material. Xa no centro histórico, outros instumentos e personaxes agardan ás miradas dos visitantes, ao igual que establecementos e balcóns, tamén contaxiados polo espíritu desa fusión entre o crochet e da música. Todo un escenario itinerante que percorrer en familia até finais deste mes.
