As feiras do libro de Galicia preséntanse este ano con dous obxectivos moi claros. O primeiro expúxoo de maneira concisa o secretario xeral de Cultura, Anxo Lorenzo: enfocar o evento coma un factor de «dinamización cultural» que axude a paliar a paulatina baixada no consumo de libros que tivo lugar durante os últimos anos. O segundo, enarbolado pola presidenta da Asociación Galega de Editores (Age) , Laura Rodríguez, consiste na presentación da nosa literatura en diferentes sociedades extranxeiras para "facer contactos" e dala a coñecer.
"O problema non é a falta de xente: temos cerca de 400.000 visitantes todos os anos. O que nos mata é que cada vez cómprase menos"
A gran novidade desta edición radica na aparición dos municipios de O Porriño e Redondela nunha programación que pretende que a media de 400.000 visitantes non faga outra cousa que aumentar. Respecto a isto, o vicepresidente da Federación de Libraría de Galicia, Xosé Antón Pedreira, afirmou que o problema "non é que non veña xente, senón que non compran". Asegura que antes había rapaces que volvían a casa cun saco cargado de libros, imaxe que lamenta non ver "desde hai moito". Esta postura foi apoiada pola presidenta da mesma asociación, Pilar Rodríguez, que recoñeceu que a industria das letras está agora "buscando o seu sitio", ao considerar que o obxectivo de democratizar os libros na década dos oitenta "xa se alcanzou". O eixo central da proxección exterior antes citada será a capital arxentina, Bos Aires, na que Santiago participará como cidade convidada cun stand propio de 200 metros cadrados. "Para nos é moi importante como colectivo estar alí", relataba Rodríguez en rolda de prensa, ao tempo que incidía na idea de «facer contactos» adiantando o que serán unhas xornadas profesionais "con autores e editores" que terá lugar o 19 de abril, dous días antes do comezo da festa das letras arxentinas. Para Lorenzo este é un destino "moi interesante", ao coincidir o evento co levantamento das restriccións na entrada de libros extranxeiros no país, o que na súa opinión creará moitas máis oportunidades; ademais de que considera ao país coma o país con máis puntos de difusión de toda Latinoamérica.
O itinerario internacional completarano Boloña, coa súa feria feira do libro infantil e xuvenil, entre os días 4 e 7 do mes de abril; Fráncfort e a súa feira internacional do libro, do 19 ao 23 de outubro; e a súa homónima en Guadalaxara, entre o 26 de novembro e o 4 de decembro. A presidenta da Age recordou a importancia da cidade alemana como «a máis importantes na compra e venda de dereitos editoriais», e confirmou a presenza de 16 empresas.
