O candidato do BNG á alcaldía de Vigo, Xabier Pérez Igrexas, asegurou esta tarde durante a súa presentación que Vigo está ante un "goberno que non goberna" e apostou por dar un "novo impulso a Vigo para facer un sociedade máis xusta e igualitaria".
A portavoz nacional do BNG, Ana Pontón, foi a encargada de presentar a Pérez co obxectivo de converter Vigo na cidade da innovación e o pulso industrial.
Pontón asegurou que o BNG se presenta cos "deberes feitos" e coa convicción de que é necesario que o nacionalismo teña presenza no Concello de Vigo para buscar outro modelo de cidade.
Para os nacionalistas, Vigo ten que recuperar o impulso industrial e o emprego sen "confrontación nin localismos" cun candidato de "canteira".
Igrexas lembrou que o BNG foi, no seu día, unha forza decisiva e determinante, tanto no goberno como na oposición e queren volver selo recuperando os votos de todas as persoas que os deixaron de votar nas últimas eleccións municipais.
"É posible construír cidade desde os barrios e parroquias e sumar nesta tarefa de moitos miles de vigueses", destacou o candidato nacionalista durante a súa intervención.