Catro persoas resultaron feridas, unha delas de gravidade, na madrugada deste sábado ao verse implicadas nun accidente entre tres vehículos en Vigo. Os servizos de emerxencia tiveron constancia do suceso pasada a medianoite a través da chamada dun particular, que alertou dun sinistro.
A colisión produciuse na Avenida da Florida e, a pesar de que as testemuñas do accidente aseguraban que había tres automóbiles implicados, no lugar só permanecían dous, polo que "todo apunta a que o terceiro continuou a súa marcha", segundo indicou o 112 Galicia. Así o comprobaron os axentes da Policía Local, que acudiron ao punto.
Tamén tiveron que intervir os bombeiros da cidade olívica para liberar un dos feridos que estaba atrapado no interior dun dos coches accidentados. Tal como apuntaron as testemuñas, un dos turismos puido envorcar a causa do impacto.
O accidente saldouse cunha vítima evacuada en estado grave, mentres que os outros tres afectados foron trasladados ao hospital de referencia, con todo, as súas lesións eran de menor importancia.
