domingo. 16.05.2021 |
El tiempo
domingo. 16.05.2021
El tiempo

Tsundoku (hai cousas peores)

Unha torre de libros a piques de virse abaixo (dou fe). C.G.PASOU O Día do Libro, pero non pasou a romaría, sobre todo para aquelas que sufrimos de tsundoku, xa saben, ese termo xaponés referido á arte (ou ao vicio) de comprar máis libros dos que se poden ler. Porque é posible meter un milleiro, en formato físico, nunha vivenda pequena sen que aquilo pareza unha biblioteca, ou quizais si. En galego, en castelán, en italiano, en francés, en portugués ou en inglés. Novela, relato, poesía, ensaio, banda deseñada... Tochos de 900 páxinas e lixeiras delicias ilustradas que se ventilan en dez minutos pero que deixan un pouso eterno.

Non me faledes do libro dixital. Que pode estar moi ben para persoas con diversidade sensorial, que é un gran invento para almacenar miles de páxinas sen gastar unha pinga de espazo (real), que che permite acceder ao dicionario cun clic, que son moito máis baratos... Pero non son unha opción para quen gosta dunha verdadeira biblioteca e do placer de tirar coas condenadas faixas dos libros que só valen como reclamo publicitario.

Cada ano por estas datas (bueno, polas datas previas ao 23-A) chóvennos a listas de novelas imprescindibles para este ano, os mellores de cada xénero, os másters do universo por temática e os máis vendidos, que non teñen por que coincidir co anterior. De feito, hai bestsellers de alta calidade (ás veces, a xente non é parva) e outros que non merecerían nin encadrarse na literatura. Pero que é un bo libro?

Vaiamos por partes. Tres días antes da data sinalada no calendario (quen contaba ver colas de xente devecendo entrar nunha librería!), chega unha desas fantásticas e oportunas notas de prensa na que unha plataforma de psicoloxía en liña nos revela (é un dicir) os cinco beneficios que ofrece a lectura. En primeiro lugar axuda a reducir o estrés, pois a lectura permítenos esa sensación de estar fluíndo e de perda da noción do tempo (todo o contrario de estar perdendo o tempo, que é que adoita pasar cando enganchamos na silveira das redes sociais ou na xungla das plataformas de contidos, nas que botamos máis tempo decidindo que ver que outra cousa).

En segundo lugar fainos máis empáticos, ou iso din, grazas a estar en contacto con realidades distintas á nosa, pois pódenos axudar a pór en perspectiva os nosos problemas e axúdanos a entender as vivencias do outro.

Tamén mellora a nosa flexibilidade mental e a nosa creatividade e, en cuarto lugar, estimula a conectividade entre neuronas (linguaxe, pensamento simbólico, visión espacial...). Finalmente, axuda a descansar o corpo, a menos que se che ocorra ler facendo o pino, ao pico pé ou nalgunha estraña postura. Non é recomendable.

Tantos beneficios para que despois veña o Barómetro de Hábitos de Lectura y Compra de Libros en España a dicirnos que a porcentaxe de españois maiores de 14 anos que le libros con frecuencia no seu tempo libre (alomenos unha vez á semana, se iso é "con frecuencia") apenas subiu en 2020 respecto ao ano anterior. En 2019 fora do 50% e en pleno confinamento acadou o histórico 57%, aínda que a media anual quedou no 52,7%. As mulleres, coma sempre, somos maioría, sobre todo a medida que se van cumprindo anos. A pesar de estar pechados na casa tanto tempo, nin sequera se notou o crecemento da poboación que le libros alomenos unha vez ao trimestre e, ademais, hai un 36% da poboación que non le nunha ou case nunca. Non saben o que están a perder.

Tsundoku (hai cousas peores)
Comentarios
ç