"O bo de Ravachol só tiña unha ilusión, iluminar este Entroido con bombillas e paixón, despois dun Nadal escuro por un alumeado tristón", recitaba María Simal na Praza da Ferraría. "Chorade, chorade todos!", berraba aflixida a presentadora do acto, María Carrera, que ía vestida de rigoroso loito.
Centos de pontevedreses despediron na Praza da Ferrería ao paxaro. Varias comparsas acompañaron o cortexo fúnebre e un grupo de pranteiros choraron desconsolados polo papagaio. Tras a súa chegada á Ferrería, o grupo Ilusiones Compañía interpretou varios temas para despedir ao finado. No acto estiveron presentes o rei Urco e Perfecto Feijoo (dono da botica onde vivía Ravachol), ademais da concelleira de Festas, Carme da Silva. No evento tamén participaron Os do Val do Lérez, pregoeiros deste Entroido e gañadores do Concurso de Murgas, que entoaron unha saeta para despedir ao paxaro.