Ciencias da Educación sela o seu compromiso co cambio na sociedade

A facultade descubriu a placa que a recoñece como membro da Rede de Escolas Unesco
Alfonso Rueda e Luísa Márquez (de costas) descobren a placa que recoñece a facultade na rede da Unesco.
photo_camera Alfonso Rueda e Luísa Márquez (de costas) descobren a placa que recoñece a facultade na rede da Unesco.

Un compromiso cos dereitos da infancia e cunha educación capaz de transformar a sociedade. Isto é o que desde o mediodía de onte simboliza para a Facultade de Ciencias da Educación e do Deporte a placa situada na súa entrada que a recoñece como o único centro universitario español que actualmente forma parte dunha rede que integra a máis de 10.000 escolas de 181 países.

"Isto non é un ornato, mostra un compromiso cunha educación que transforma ás persoas e o mundo", salientou a coordinadora da Rede de Escolas PEA-Unesco en Galicia, Luísa Márquez, responsable de descubrir esta placa xunto co vicepresidente da Xunta de Galicia, Alfonso Rueda. O evento serviu de inicio para os actos cos que o campus pontevedrés conmemorou o Día Internacional dos Dereitos da Infancia, celebrado o pasado domingo. Organizado polo profesor Jorge Soto, tiña como obxectivo poñer de relevo a situación dos refuxiados e refuxiadas, cuxo drama se viu representado polo mar de mantas térmicas despregado no acceso á facultade e que serviu tamén para reivindicar a erradicación da violencia machista no día internacional da loita contra esta lacra social.

Tras recibir no mes de maio a avaliación positiva da comisión internacional á súa incorporación a esta rede impulsada por esta organización das Nacións Unidas (que ten como obxectivo o fomento dunha educación para o desenvolvemento sostible e a promoción dos valores da paz, os dereitos humanos, a cooperación internacional e o diálogo intercultural), a facultade celebrou a súa constitución como membro da mesma nun acto presidido polo vicerreitor do campus, Juan Manuel Corbacho; o vicepresidente da Xunta, Alfonso Rueda; o decano, Vicente Romo; a concelleira de Benestar Social, Carmen Fouces; o coordinador da Comisión PEA-Unesco do centro, Miguel Cuevas, e os mencionados Soto e Márquez. Corbacho destacou que é unha "mostra do compromiso desta facultade", coa sustentabilidade e cos dereitos "dos e das máis vulnerables", os nenos e nenas, e que Rueda lembrou que, se ben a placa "queda como testemuña de que hai moito traballo, convencemento e implicación, xa que non pode ser casualidade que de toda España sexa a única que ten este recoñecemento", esta distinción supón tamén "moita responsabilidade".

O acto completouse coas actuacións do coro do campus e de dous músicos e estudantes, Raúl Paz, que interpretou Imagine, de John Lennon, e Noelia Solleiro, que compuxo un tema para a cita.

Comentarios