Imprimir

A consulta de En Marea sobre Quinteiro comeza este martes

Europa Press | 21 de mayo de 2018

Paula Quinteiro e Carmen Santos. PEPE FERRÍN (AGN)
Paula Quinteiro e Carmen Santos. PEPE FERRÍN (AGN)

Ese mesmo día, as bases de Podemos pronunciaranse sobre a permanencia nos seus cargos dos líderes de Podemos, Pablo Iglesias e Irene Montero

A consulta aos inscritos de En Marea sobre o futuro da deputada Paula Quinteiro comezará este martes ás 10.00 horas, o mesmo día no que, ás 17.00 horas, as bases de Podemos se pronunciarán sobre a permanencia nos seus cargos dos líderes de Podemos, Pablo Iglesias e Irene Montero, tras a compra dunha casa na serra madrileña cunha hipoteca de 540.000 euros. 

Dáse a circunstancia de que ambas as consultas afectan a militantes de Podemos, posto que Paula Quinteiro, ademais de deputada do partido instrumental, é inscrita da formación morada e a coincidencia de ambos os plebiscitos valeulle ao portavoz de En Marea, Luís Villares, para reivindicar a que el defende para a parlamentaria galega. 

Afíns a Paula Quinteiro e a propia deputada, que se viu envolvida nun incidente coa Policía Local de Santiago o 18 de marzo durante un control nocturno, mostráronse moi críticos coa decisión de En Marea de someter un asunto "privado" a consulta das bases, xa que alegaron que non era unha cuestión política estratéxica. 

Pola súa banda, voces como a do viceportavoz de En Marea, Antón Sánchez, mostráronse partidarios de levar a cabo, en lugar dunha consulta, un proceso revogatorio para ofrecer "garantías" á deputada na defensa da súa postura. Mentres que o atestado policial daquela noite di que a deputada "dificultou" a identificación de persoas do seu grupo, Paula Quinteiro defendeu que o único que fixo foi identificarse para "intermediar". 

A unhas horas de que comece a consulta de En Marea, cuxo resultado se coñecerá o xoves pola mañá de forma oficial, Luís Villares comparou ambas as preguntas á militancia. "Se é positivo formular unha consulta, con máis razón éo formular unha consulta cando é sobre algo que non é estritamente persoal e está vinculado ao político", defendeu. 

Mentres, a secretaria xeral de Podemos Galicia, Carmen Santos, quixo diferenciar entre ambas, Aínda que cre que as dúas "son excesivas", a de Pablo Iglesias e Montero responde a unha "cuestión de confianza", mentres que a de Quinteiro, insistiu, non segue "os procedementos regulados" para a revogación dun cargo nos estatutos de En Marea.

PREGUNTA DA CONSULTA. As bases de En Marea, cun censo duns 2.400 inscritos, deberán contestar "si" ou "non" á seguinte pregunta: "*Consideras que Paula Quinteiro debe dimitir do seu cargo como deputada do Parlamento galego polo uso da súa acta de deputada para un asunto particular?". 

No marco deste proceso, o pasado venres, a dirección de En Marea enviou aos inscritos os argumentos para levar a cabo o proceso, nos que se defende que o que se busca é fixar posición política sobre o ocorrido. "Non se trata", apunta o documento, de "ningún proceso disciplinario", senón da "fixación das bases políticas sobre as que é posible construír unha práctica política transformadora". 

Pola súa banda, Paula Quinteiro esgrimiu a súa "indefensión". Na carta remitida aos militantes, remarcou que non incumpriu "ningún punto" do código ético de En Marea nin actuou "fóra da liña política". 

Próximos á deputada, que xa dixo que non se sentirá vinculada ao resultado da consulta e que non ten pensado dimitir, impulsaron un manifesto no que chaman a non participar e que pouco antes da consulta superaba as 600 firmas, aínda que neste caso non fai falta se membro de En Marea para poder sumarse ao documento. 

Puede ver este artículo en la siguitente dirección /articulo/galicia/consulta-marea-paula-quinteiro-comeza-martes/20180521193308981750.html


© 2020 Diario de Pontevedra

Lepanto 5, Pontevedra

Tlfno: 986 011 100

(Grupo El Progreso)