O Equipo de Policía Xudicial da Compañía da Guardia Civil en Noia detivo a un veciño de Vilagarcía de Arousa como presunto autor de 14 roubos con forza en igrexas da zona de Noia, Sar e Barbanza.
Segundo informou o Instituto Armado, a investigación iniciouse en abril de 2018 cando a Guardia Civil detectou un aumento de roubos en igrexas próximas a Compañía da Guardia Civil de Noia, o cal, engade, "tamén xerou certa alarma social na zona".
Froito do traballo policial, constatouse que o detido "trasladábase desde o lugar onde tiña establecida a súa residencia até as igrexas onde perpetraba os roubos e adoitaba actuar sobre o seis da mañá", relataron as mesmas fontes.
Tamén os axentes pescudaron que o sospeitoso "estaba vinculado a feitos similares na provincia de Pontevedra", ao coincidir no modus operandi.
Os roubos consistían maioritariamente na subtracción do diñeiro en efectivo que se recollía durante as misas e que ía destinado a obras caritativas, "polo que non se pode saber a canto ascende a cantidade con exactitude", conclúe a Benemérita.
