Hai menos de dez alumnos por clase. As aulas prácticas de instrumento, son, de a dous: mestre ou mestra e alumno ou alumna. Algúns dos estudantes, de momento, dous, seguen as aulas por streaming desde casa por decisión propia para manter a máxima seguridade contra o coronavirus. Para ensaiar na súa disciplina, manda audios ou conectan en directo cos mestres, por zoom. O resto, acude, un a un, e esperan na porta da Casa da Cultura de Riomaior. Un mestre diríxese á porta e abre para recibilos e levalos á clase.
Éntrase por un lado e sáese por un carreiro distinto. Nas aulas, se o alumno ou alumna toca na sección de vento, permanece parapetado por unha mampara transparente cedida polo Concello e a tres metros do mestre como mínimo. Nos ensaios, limpa a tuba, frauta ou instrumento, e bota o papel a un cubo do lixo con tapa. Os alumnos máis pequenos aprenden separados por varios metros, sentados no chan.
Así é a nova normalidade da Escola de Música de Vilaboa, que vén de retomar a súa actividade con varias novidades aínda máis sorprendentes que todo o estricto formato ao que obriga a pandemia. A primeira das sorpresas foi que neste novo curso, o centro ten máis alumnos que no anterior, iniciado en setembro de 2019, no que non se vislumbraban as consecuencias da durísima crise sanitaria.
"En total, temos 139 alumnos e alumnas", afirma o director, Daniel Figueira, que recoñece que chegan novos aprendices de músicos por primeira vez "da zona de Domaio, de Cangas e de outros puntos, e tamén por primeira vez temos lista de agarda porque non hai máis prazas"
O fagote novo, grazas ás rifas
SEN CONCERTO DA BANDA. A escola de música, que desde os seus inicios conta co mesmo plantel de mestres e mestras, (máis dunha ducia), non ten este ano aula de extensión en O Toural, porque os centros educativos non se poden empregar para outros usos non reglados desde o inicio da crise. Tampouco ten unha das súas principais fontes de ingresos: as actuacións da banda, coas que se costeaban "material, achegas á Seguridade Social e algúns gastos" e que coas restriccións e o confinamento quedaron no camiño.
Todo isto levou a unha suba no prezo das taxas que pagan os propios nenos, de aí que sexa sorprendente a boa acollida que ten esta actividade, mesmo en tempos de crise.
A pesar diso, das limitacións que teñen as axudas oficiais e da crise que están a afrontar moitos dos patrocinadores, o centro conseguiu saír adiante nos tempos da pandemia sen que ningún dos seus cativos perdera a ilusión e sen renunciar a horas de materia, impartir novos instrumentos, ou desenvolver proxectos, como o concerto que preparan para Nadal e que, se mellora a situación sanitaria o suficiente como para celebrarse, contará co acompañamento da voz dunha soprano.
Os alumnos chegan tamén de concellos limítrofes e hai listaxe de agarda, a pesar de que este ano, a crise obligou a subir os prezos das clases
Se sucede o contrario, todo o mundo confía en poder facer xurdir o talento dalgún xeito. Os nenos xa levaron un revés en setembro, cando se suspendeu o seu concerto na Lagoa de Castiñeiras un día antes da aplicación de medidas restritivas por mor da covid-19. "Encaixárono moi ben", di o director, que mesmo se sorprendeu da enteireza que demostraron os alumnos e alumnas.
"O que ten Vilaboa é unha cantidade de talento incrible. Aquí os nenos, por algún motivo, están especialmente dotados e implicados coa música e esta escola o único que quere é responder a ese interese",conclúe o director do centro.
