Imprimir

Fondo pesar na IGM polo falecemento de Chato Galante en Madrid

Redacción | 30 de marzo de 2020

Chato Galante en Pontevedra en novembro. JAVIER CERVERA-MERCADILLO
Chato Galante en Pontevedra en novembro. JAVIER CERVERA-MERCADILLO
Este ex preso dos cárceres franquistas e torturado por 'Billy el Niño' foi "un referente inesquecible" na loita contra os crimes da ditadura

As asociacións de memoria histórica de Galicia, reunidas na Iniciativa Galega pola Memoria (IGM), expresaron este domingo o seu pesar polo falecemento en Madrid de José María Chato Galante a causa do coronavirus. "Foi un referente inesquecible da loita pola xustiza e fronte á impunidade dos crimes do franquismo".

Chato Galante, ex preso nos cárceres franquistas e torturado por Billy el Niño, destacou por ser membro do colectivo La Comuna Presxs del Franquismo, da Coordinadora Estatal de Apoio á Querela Arxentina Ceaqua e colaborador estreito do movemento memorialista galego.

Nos últimos tempos, Chato Galante visitou en numerosas ocasións Galicia para participar en diferentes actividades organizadas por asociacións locais e da Iniciativa Galega pola Memoria. A súa presenza "foi determinante para que se reactivase en Galiza a loita contra a impunidade dos crimes do franquismo e a participación de familias e entidades na causa aberta polo xulgado do criminal número 1 de Buenos Aires, como Querela Arxentina", sinala o colectivo.

Entre as súas intervencións públicas o movemento memorialista salienta a da Homenaxe nacional ás vítimas do franquismo en San Simón, en xullo do 2019, e o acto de adhesión á Querela Arxentina promovido pola Deputación de Pontevedra en novembro dese mesmo ano. Ademais, participou en actividades que tiveron lugar no Val Miñor, Ribeira, Pontevedra e Vigo. Dentro da súa "inxente labor social" destaca a participación no documental El silencio de otros (2018), que o levou a falar da represión franquista e da loita pola xustiza en cidades de todo o mundo, en asociacións e sobre todo no ámbito escolar, que era o público "que el estimaba máis".

Durante a xornada do domingo, e tras coñecer a noticia do recente falecemento do ex preso no franquismo en Madrid, o movemento memorialista galego, da man da Iniciativa Galega pola Memoria, quixo lembrarse da figura de Chato Galante e tamén agradecer o "inmenso exemplo de loita, de xenerosidade e de entusiasmo que nos brindou o Chato Galante". Deste xeito, o movemento memorialístico tamén quixo expresar o seu compromiso por "manter viva" a súa memoria "da mellor maneira que se pode facer", así como de dar "continuidade, ate rematala, á tarefa que el nos deixou en herdanza: facer xustiza".

Puede ver este artículo en la siguitente dirección /articulo/galicia/fondo-pesar-igm-polo-falecemento-chato-galante-madrid/202003301421401079682.html


© 2020 Diario de Pontevedra

Lepanto 5, Pontevedra

Tlfno: 986 011 100

(Grupo El Progreso)