En vista do cruce de demandas e acusacións das últimas semanas e días entre o alcalde e Plataforma Aberta Cidadá (PAC), nomeadamente, e vostede, non podo comezar doutro xeito esta entrevista: que cre que van sacar en limpo os electores de toda esta liorta?
Os electores non queren políticos que xeren problemas, como Rafael Cuíña e o seu cuatripartito, senón que os solucionen. Cómpre lembrar que os primeiros en xudicializar a política local foron eles, denunciándonos ao anterior Goberno do PP co obxectivo de inhabilitarnos. Pero esa denuncia arquivouse hai case un ano e, sen dicir nada, seguiron utilizándoa para atacarnos e intimidarnos dunha forma indigna. En canto á denuncia contra Rafael Cuíña e o seu concelleiro de Comercio polo caso dos seguros, entendemos que hai unha prevaricación e un tráfico de influencias de libro, pero agora xa será a Xustiza quen dirima ese tipo de cuestións.
Ten recoñecido que pecou de exceso de confianza nos últimos comicios locais, que o apartaron da Alcaldía logo de 25 anos co bastón de mando. Sente dalgún xeito que sae reforzado despois destes catro anos na oposición ou é máis difícil gañar agora unhas municipais desde a súa nova posición, fóra do Goberno?
O que percibo na rúa é que hai moito cansanzo entre os lalinenses coa forma de gobernar do cuatripartito. Lalín non está mellor hoxe que hai catro anos, outros concellos adiantáronnos en moitos parámetros e, o que é máis preocupante, entristéceme ter que dicir que hai xente que ten medo a expresar libremente a súa opinión polas represalias que o Goberno poida tomar contra eles. En Lalín hai algunhas familias que pensan que seguimos na época feudal e nós queremos poñerlle fin a esta etapa escura. Agora que a xente xa coñece a Rafael Cuíña e pode comparar, estou convencido que moitos desencantados con el polas súas mentiras e falcatruadas voltarán verse representados no PP.
Cal é o proxecto do PP para a localidade? Propón un Lalín diferente ou unha continuidade do traballo que fixo ata 2015 na Alcaldía e de proxectos que, por perder os comicios hai catro anos, quizáis non puido levar a cabo?
Neste arranque da campaña vimos de asinar un contrato cos lalinenses para garantirlles que se goberna o PP o mesmo día 27 de maio comezaremos a traballar nas cuestións estratéxicas para que Lalín volva ser un referente en toda Galicia e un concello envexado: a cuarta fase do polígono Lalín 2000, o Centro de Servizos Integrados, a pista de atletismo, o parking gratuíto, 5 millóns de euros para a rede viaria rural, a creación dunha gran praza á carón da igrexa, etc. Todos eles, proxectos que configurarían un mellor Lalín. Pola contra, se non conseguimos maioría absoluta, do que se falará o 27 de maio será das liortas polo reparto das dedicacións exclusivas e das concellerías, etc.
O horizonte político de Lalín non pode semellar máis fragmentado. Son oito candidaturas concorrendo á Alcaldía o 26 de maio. Está aberto a pactos en caso de non obter a maioría?
No Partido Popular sempre saímos a gañar os partidos, non a empatar e moito menos con resultados amañados previamente, como fan os demais, que xa negociaron ás costas dos veciños. En Lalín só hai dúas opcións reais: ou goberna o PP con Pepe Crespo de alcalde ou goberna Rafael Cuíña, porque un voto para Román Santalla servirá para facer a Cuíña alcalde; un voto para Francisco Vilariño fará a Cuíña alcalde; e un voto para Lara, tamén fará a Cuíña alcalde. Incluso os votos ás demais forzas, polo risco de que non obteñan representación, tamén axudarían a facer a Cuíña alcalde.
Sei que non deben extrapolarse os resultados dunhas xerais para unhas municipais, pero teme que a baixada xeral de votos do PP o pasado domingo 28 de abril se repita nas locais do próximo 26M?Estamos nun escenario completamente distinto e aquí non hai nada decidido, por moito que algúns se empeñen en afirmar o contrario. En canto ás Xerais, co resultado que nos quedamos no PP é que Lalín foi o concello de máis de 20.000 habitantes que resultou a mellor porcentaxe de votos de calquera dos partidos, xa non só do PP, senón de todos. Polo tanto, dentro da conxuntura xeral, non foi un mal resultado nin moito menos.
