Loureiro, árnica, fiúncho, romeu, codeso e moitas máis. Os supersticiosos non deixan marxe á mala sorte na noite de San Xoán e conxuran para despistar os males. "Estas herbas gárdanse todo o ano porque disque espantan as meigas". Explicábao Carmen Arribas, veciña de Lourido de 84 anos cuxos ramos de San Xoán estaban este martes moi solicitados á porta do Mercado. "Moitos aniños levo eu facéndoos e vendéndoos", explicaba a muller, que cultiva na súa horta as herbas que vende.
"Son eu a que fai os ramos, teño todo plantado porque isto serve para moitas cousas, para infusións e moito máis", contaba Arribas. Sobre a tradición do ramo de San Xoán, explicaba a cada cliente, con paciencia, como empregar o manoxo de herbas na noite deste martes. "Non pode ser aínda de noite cando metas as herbas en auga, ben cubertas, teñen que pasar toda a noite fóra, ao aire e, pola mañá, o día de San Xoán, lavas o corpiño todo con esa auga, podes bendecir o coche con ela, ou a casa... é como auga bendita", resumía a muller mentres despachaba ramos. Hai quen, unha vez pasado o día de San Xoán, saca o ramo da auga e o deixa pendurado cara abaixo todo o ano para protexerse de males. A tradición di tamén que as plantas deben somerxerse en auga recollida de sete fontes diferentes.
"Eu cómprolle a verdura sempre e agora veño buscar estes ramos porque sei que son completos", explicaba unha muller mentres agardaba a súa quenda. A media mañá Arribas xa esgotara case todos os manoxos que fixera para a xornada e dosificaba como podía as herbas que lle quedaban.
A demanda era moita. Numerosas floristerías tanto do Mercado como do resto da cidade vendían tamén ramos de San Xoán. A tradición fala de sete ou 14 herbas diferentes con poderes máxicos que se unen ao poder sanador da noite de San Xoán. Saltar a fogueira, purificarse, recibir nove ondas no mar, ou lavar a cara coa auga de San Xoán son só algún dos ritos da noite máis curta do ano para atraer á sorte. "Cos meses que levamos haberá que comprar as herbas, non? Este ano fan máis falla que nunca", comentaba unha muller mentres agardaba para facerse con un ramo.