Imprimir

Kalandraka conta os seus contos online

Diario de Pontevedra | 26 de marzo de 2020

Xosé Ballesteros contando 'O coelliño branco'
Xosé Ballesteros contando 'O coelliño branco'
A editorial pontevedresa incorpora á súa canle de televisión a sección 'Contos contados', na que autores e contadores como Xosé Ballesteros ou Bea Campos recrean títulos como 'O coelliño branco' ou 'A cebra Camila'

"Érase unha vez un coelliño branco que un día saíu da súa casa...". Así comeza o autor e director da editorial Kalandraka, Xosé Ballesteros, a contar O coelliño branco, un dos títulos de máis sona do selo pontevedrés, na sección Contos contados. A iniciativa, que reúne a autores e contadores para sesións de contacontos online, viu a luz o 16 de marzo en Kalandraka Tv, a canle que a editorial puxo en marcha en internet en 2018.

"Vivimos momentos excepcionais nos que as circunstancias requiren que permanezamos na casa", explica o selo, que se suma desta maneira ás numerosas iniciativas online xurdidas no ámbito cultural dende a declaración do estado de alerta por mor da expansión do coronavirus. "Dende Kalandraka queremos contribuír coa proposta Contos contados, na nosa canle de televisión dixital. Con esta sección pretendemos levar o amor polos libros e pola lectura a todos os fogares".

RELATOS E VERSOS. O selo explica que, entre os novos contidos desta sección, haberá contos tradicionais, relatos de creación, versos e melodías para prelectores, poemas recitados... "Uns, na voz das súas autoras e autores; outros, recreados por narradoras e narradores", Segundo os promotores da idea, o obxectivo é compartir estas historias coa familia, as amizades, o ámbito escolar... "Porque, nestes tempos, a palabra é máis necesaria ca nunca".

Tras Xosé Ballesteros contando O coelliño branco, unha adaptación dun conto popular portugués, fóronse colgando vídeos doutros autores e contadores. A actriz e contadora Bea Campos aparece poñéndolle voz a tres títulos: O poliño da abeleira, na adaptación deste conto tradicional que realizou Antonio Rubio con ilustracións de Gabriel Pacheco; Animais, tamén de Antonio Rubio, neste caso con ilustracións de Óscar Villán, e Unha última carta, obra gañadora do IX Premio Compostela.

Bea Campos lendo Animais
Bea Campos lendo 'Animais'
 

O 19 de marzo, Día do Pai, a educadora infantil Ana Abelenda leu P de Papá, e, ao día seguinte, en conmemoración do Día da Poesía, rescatouse un diálogo poético entre Antonio García Teijeiro e Juan Carlos Martín Ramos.

Olalla González e a súa filla con Garavanciño
Olalla González e a súa filla con 'Garavanciño'
 

As dúas últimas contadas subidas á canle, desta mesma semana, son de A cebra Camila, a cargo da libreira Loli Blanco, e a de Garavanciño, a conta da contadora Olalla González acompañada pola súa filla Matilda.

Loli Blanco e A cebra Camila
Loli Blanco e 'A cebra Camila'

Puede ver este artículo en la siguitente dirección /articulo/cultura/kalandraka-conta-seus-contos-online/202003261642221079211.html


© 2020 Diario de Pontevedra

Lepanto 5, Pontevedra

Tlfno: 986 011 100

(Grupo El Progreso)