Imprimir

O Parlamento condena o Holocausto, que tivo "colaboración" do franquismo

Efe | 30 de enero de 2019

Miguel Santalices. EP
Miguel Santalices. EP

"Tivo a súa orixe no intento de eliminación da disidencia política e ideolóxica e derivou nun xenocidio que contou coa colaboración da ditadura franquista", asegura o texto

O Parlamento de Galicia aprobou este mércores unha declaración institucional en memoria das vítimas do Holocausto que, segundo reflicte o texto, "tivo a súa orixe no intento de eliminación da disidencia política e ideolóxica e derivou nun xenocidio que contou coa colaboración da ditadura franquista".

Na resolución, os grupos con representación na Cámara galega -PP, PSOE, En Marea e BNG- lembran aos máis de 10.000 republicanos españois que terminaron deportados nos campos nazis "pola colaboración do ditador Francisco Franco co nazismo alemán e o fascismo italiano".

O texto sinala que entre os seis millóns de mortos dese xenocidio, principalmente de xudeus, tamén houbo outras minorías que foron vítimas, incluídos galegos, e que aqueles que lograron ser liberados "non puideron regresar porque a ditadura franquista, que lles retirou a nacionalidade, negoulles o dereito a regresar ao seu país de orixe".

A declaración, lida polo presidente do Parlamento, Miguel Santalices, no pleno celebrado este mércores, lembra que o 1 de novembro de 2005 a Asemblea Xeral das Nacións Unidas decidiu designar o 27 de xaneiro como Día Internacional de conmemoración anual en memoria das vítimas do Holocausto, á que se suma Galicia.

Deste xeito, a Cámara lexislativa fai seu o rexeitamento de Nacións Unidas a "toda negación, xa sexa parcial ou total, do Holocausto como feito histórico", e igualmente condena "todas as manifestacións de intolerancia relixiosa, incitación, acoso ou violencia contra as persoas ou comunidades baseadas na orixe étnica ou nas crenzas relixiosas, teñan lugar onde teñan lugar".

Puede ver este artículo en la siguitente dirección /articulo/galicia/parlamento-condena-holocausto-tivo-colaboracion-do-franquismo/201901301211291020176.html


© 2020 Diario de Pontevedra

Lepanto 5, Pontevedra

Tlfno: 986 011 100

(Grupo El Progreso)