O Pontevedra perdeu tódalas súas opcións de disputar o play-off despois de caer contra o Atlético de Madrid B nun mal encontro (0-2) que tivo un claro protagonista: Sergio Camello Pérez. O 9 visitante foi un auténtico pesadelo para o equipo granate e, con dous goles, certificou a fin da temporada dos de Luismi.
A primeira parte do Pontevedra estivo condicionada pola calor, o primeiro gol do Atlético de Madrid e a falta de ideas do equipo granate. Aos doce minutos, unha perda granate co equipo descolocado permitiu a Joaquín chegar á área, fixar aos centrais e ceder a Camello para que batese a Edu no man a man cun disparo raso e axustado.
A partir dese momento o Pontevedra levou a iniciativa, pero sen capacidade para chegar ao campo contrario para xerar ocasións de gol.
Os granates perdían os duelos individuais, movían o esférico con dificultade no centro do campo e tiñan que abusar do xogo en longo para superar a presión dos colchoeiros, que mesmo puideron facer o 0-2 nun tiro afastado de Cristian.
Dous tiros de Borja e Kevin desde fóra da área foron toda a produción ofensiva do bloque de Luismi, ao que lle faltou frescura na primeira metade.
Un segundo gol de Camello nunha boa xogada do Atlético B pola esquerda, nada máis retornar do descanso, deixou o partido case sentenciado. A pesar dos constantes intentos do Pontevedra por achegarse á área rival con entradas pola banda e centros, foi o filial quen estivo máis próximo a facer o terceiro, sobre todo nun man a man de Camello –sempre Camello–.
📣¡GRACIAS POR SER UNA AFICIÓN DE 10! 💪#forzagranate pic.twitter.com/8tR5Oe4VUf
— PontevedraCF (@PontevedraCFSAD) 12 de maio de 2019