A PONTEVEDRA do século pasado. O Concello adica o calendario de 2021 á historia da capital da provincia a través de 24 fotografías, planos, cartaces, postais e proxectos que ilustran a súa evolución dende 1900. O almanaque, do que se editaron 15.000 exemplares, poderá recollerse de forma gratuíta a partires deste xoves na Oficina de Turismo e na sede municipal de Michelena 30.
Ademais de visibilizar graficamente a historia recente da cidade, a iniciativa trata de poñer en valor a importancia do traballo de custodia, conservación e difusión que se realiza dende o Arquivo Municipal. De feito, todas as imaxes proceden dos seus fondos.
Ponte do Burgo en 1955, un ano despois da súa reforma. ARQUIVO MUNICIPAL
O calendario inclúe un cartaz, tres vistas aéreas, dous planos, dúas postais, 13 fotografías e tres proxectos. Estes documentos complétanse cunha extensa e detallada información que os contextualiza historicamente e á que pode accederse a través dun código QR incluído no propio almanaque. A imaxe máis antiga é a dun plano de Pontevedra e os seus arredores, que data de 1901, e a máis recente, é unha vista aérea da urbe de 1965.
HISTORIAS. No anuario aparecen dous proxectos que nunca chegaron a ver a luz. Un foi a construción dun edificio na antigua praza de Indalecio Armesto (hoxe Praza da Verdura) para o grupo escolar Álvarez Limeses. Aquela escola, deseñada en 1951 polo arquitecto Emilio Quiroga Losada, ía ocupar a actual Casa da Luz. Outra das obras que tampouco saíron adiante, do ano 1944, foi a prolongación da rúa de García Cambia, do arquitecto municipal Juan Argenti Navajas.
Barrio das Corvaceiras con embarcacións sobre o río Lérez (1914-1915). ARQUIVO MUNICIPAL
As vistas da ponte da Barca, coa vella pasarela do ferrocarril; das Corvaceiras; do barrio de Campolongo; de Santa María; do viaducto medieval do Burgo; da Ferraría; da ponte do Couto sobre o Gafos; da Casa do Concello ou da Praza da Pedreira son outras das imaxes que poderán verse neste anuario. Nel tamén se inclúe o cartaz das augas mineromedicinais Lérez de 1919, que publicitaba a auga embotellada no balneario de Casimiro Gómez. Esta zona de baños, inaugurada en 1906, explotaba os mananciais de Monte Porreiro e das Aceas. A súa sona chegou a outros países de Europa e América grazas a campañas en prensa. En Inglaterra creou The Lerez Natural Mineral Water Company, obtivo o título de provedor da Casa Real Española e chegou a recibir importantes persoeiros da política, da cultura e da realeza. O balneario pechou tras comezar a Primeira Guerra Mundial.
A capa do calendario incorpora a acuarela que o pintor italiano Pier María Baldi fixo en 1669. Nela vese Pontevedra e O Burgo.