Pontevedra volveu estar presente onte nas actividades organizadas en Madrid con motivo do Cumio do Clima. Neste caso, fíxoo participando na mesa de debate ‘As políticas municipais fronte á contaminación atmosférica e o cambio climático’, unha actividade paralela organizada polo Ministerio de Sanidade, Consumo e Benestar Social no espazo administrado pola Unión Europea, dentro do Ifema, onde se desenvolve o Cumio COP25 de Nacións Unidas entre o 2 e o 13 de decembro.
É a segunda vez nunha semana que o alcalde Miguel Anxo Fernández Lores se traslada a Madrid para tomar parte nunha das conferencias oficiais para presentar a experiencia de Pontevedra, exemplo de boas prácticas en aspectos de máxima actualidade ao estar concibido como un modelo holístico. A primeira participación foi no foro organizado polo Ministerio de Fomento sobre ‘Experiencias inspiradoras: urbanismo e clima’, e nesta segunda ocasión a cita estivo promovida polo Ministerio de Sanidade para abordar a contaminación atmosférica e as súas consecuencias para a saúde.
O alcalde de Pontevedra que foi presentado por Faustino Blanco, secretario de Estado de saúde e consumo, explicou que a cidade do Lérez "leva 20 anos traballando por mellorar a calidade de vida dos seus veciños e veciñas seguindo todas as pautas máis avanzadas do mundo saídas da carta de Aalborg, da cumbre de Río, do Habitat I, Habitat II... Levando á práctica como eixo fundamental o respecto ao medio nos espazos urbanos que están sendo deteriorados especialmente polo uso do vehículo privado e pola ocupación do espazo público". O alcalde engadiu que, consecuentemente, "con ese traballo e co apoio da veciñanza, Pontevedra ten uns resultados que superan xa este ano as previsións da Axenda 2030".
COS CIDADÁNS. O rexedor nacionalista destacou que as decisións políticas "consensuadas cos cidadáns" teñen efectos positivos para evitar o cambio climático. Por iso fixo un chamamento á responsabilidade dos políticos municipais "que teñen que asumir as súas competencias con valentía e determinación", dixo, porque "sinceramente cremos que non se está avanzando o suficiente, especialmente por parte dos Estados, das empresas e tamén por parte dalgúns municipios".
Lores dixo que lle gustaría que o Cumio do Clime "fose máis efectivo", pero tamén subliñou que está poñendo no primeiro plano da opinión pública a situación na que está o planeta. Por parte do público e dos ponentes quedou patente o respecto polo modelo de Pontevedra, que supón "un avance nas políticas municipais e ambientais", reiterou o alcalde. De feito, o modelo pontevedrés estivo presente en todo o debate como punto de referencia de actuación para outras cidades e vilas do Estado, dende Madrid, a Barcelona ou Valladolid, presentes neste encontro.
Xunto a Miguel Anxo Fernández Lores, tamén participaron na actividade tenente de alcalde de Madrid Begoña Villacís; o alcalde de Valladolid, Óscar Puente; o concelleiro de Emerxencia climática e transición ecolóxica de Barcelona, Eloi Badia, e o representante en España da Comisión Europea, Francisco Fonseca.
A mesa foi moderada polo secretario de Estado de Saúde e Consumo, Faustino Blanco.