A localidade de Sanxenxo acollerá a súa I Festa do Libro desde este martes ata o vindeiro domingo, día 15. O obxectivo desta iniciativa é ampliar a programación de actividades culturais da zona e impulsar o desenvolvemento do sector editorial.
Esta iniciativa está promovida pola Federación de Libreiros de Galicia e o Concello de Sanxenxo e conta co apoio do Consello de Cultura da Xunta de Galicia e da Deputación Provincial. Ten como lema Ler sen fronteiras para homenaxear a escritora María Victoria Moreno.
O programa inclúe actividades infantís e xuvenís ademais de presentacións, firmas de libros, charlas e coloquios que permitirán o contacto directo entre autores e lectores.
MARTES. A feira dará comezo este martes ás 18.00 horas. Ás 20.30 horas o profesor e filólogo Marcelino Agís Villaverde será o encargado de ler o pregón co que se inaugurará oficialmente a cita.
Acto seguido, ás 21.30 horas o escritor Félix Carreira descubriranos o mundo de ficción de Los caballeros Negros y la corona Verde da editorial Mablaz.
Ademais, poderase gozar da exposición Historia da Literatura Fantástica de Urco editora.