Imprimir

Prioridades

Chus Gómez | Non tes tu fe

Diario de Pontevedra | 26 de febrero de 2020

Un mupi anunciando a Semana Santa de Almería. EUROPA PRESS
Un mupi anunciando a Semana Santa de Almería. EUROPA PRESS
As tribunas das procesións, un ben de primeira necesidade

HAI UNS DÍAS fíxose viral unha reportaxe de Thais Villas en El Intermedio na que entrevistaba a distintas persoas anónimas a propósito da subida do Salario Mínimo Interprofesional (SMI), fixado agora en 950 euros. O espazo tiña todos os ingredientes para triunfar nas redes: a eterna loita de clases e a ansia viva pola rexouba a conta da vida dos que máis teñen (materialmente, quero dicir), esa mesma que fai triunfar as revistas tipo Hola! ou os programas que nos abren a portas a mansións, castelos e iates. Xa poden imaxinar o festín.

No "barrio pobre" os veciños aplaudían a medida pero aínda lles parecía escasa, visto o custo da vida actual, e con isto refírome a pagar o aluguer ou a hipoteca dun pisiño normal, os recibos da luz e do gas e o ventilador un día de verán a 35 graos. E, xa poñéndonos exquisitas, ir almorzar coa túa filla un domingo ao bar de abaixo. Por só 2,30 euros cada unha, tampouco vaiamos botar foguetes. No "barrio rico", pola contra, parecíalles malísima a subida, que como se pode atrever este goberno de comunistas a obrigarnos a pagar 50 euros máis a cada escravo (perdón, empregado), porque se só fora un... Pero son 10.000 e xa ven que non lle saen as contas a este pequeno empresario ao que unha nómina de 950 euros lle parece un exceso, pero que a el boa falta lle fai a súa, de máis de 5.000, para manter o seu ritmo de vida.

Aínda continúo abraiada coa naturalidade coa que algunha xente conta en prime time que con menos ingresos lle sería moi difícil seguir pagando o paddle, o fútbol ou o esquí. Outras non saben o que é un ventilador porque, obviamente, teñen aire acondicionado en toda a casa (tamén no chalé de veraneo, na costa) e se a calor apreta aínda se poden tirar á piscina (privada, obviamente) mentres a asistenta lles trae uns daiquiris.

Ricas e pobres hóuboas sempre e inxenuas seriamos se pensaramos que sistema vai cambiar algo máis aló que un chispún como o da suba do SMI, que algo é algo. Porén, haberá que centrarse nas prioridades. E nalgunhas familias o primeiro é encher a neveira (e o bandullo) e noutras a decisión sobre onde empezar meter a tixeira empeza moito máis arriba, entre as habituais saídas a restaurantes caros ou as vacacións exóticas.

Prioridades. Disto entenden, pero non moito, certos gobernos. Foi o que pensei a propósito da proposta do presidente da Junta de Andalucía, Juanma Moreno (cabecilla do trifachito), que lle propón ao Ministerio de Hacienda unha rebaixa do IVE. Quizais nalgún medicamento? Na luz e no gas? Quizais nos cueiros? En alimentación? A quen lle importa todo iso? O que as andaluzas precisan é que lles rebaixen os impostos nun ben de primeirísima necesidade, como é o aluguer das cadeiras, tribunas e palcos para ver as procesións de Semana Santa. Porque neste caso, un penitente non tería por que pagar o 21% de IVA podendo deixalo na metade.

A sociedade do benestar era isto. Moreno apela á "importancia religiosa y cultural y la labor social de las hermandades y cofradías que lo justifican". Cultura, din. Se falan de cultura igual podían potenciar as bibliotecas, o cine ou o teatro. Tamén podían falar de saúde, de emprego, de educación, do mundo agrario que tan mal o está a pasar... E isto pasa nunha comunidade que soporta o 20,8% de paro, que ten un 38,2% de poboación en risco de pobreza e unha taxa de fracaso escolar do 21,9%. Pero, amigas, con la Iglesia hemos topado.

Porque no mundo feliz de Moreno e compañía o máis lóxico é querer baixarlle os impostos aos que teñen a posibilidade de alugar estas cadeiras. O resto da poboación, as señoriñas que viven cunha pensión non contributiva coa que manteñen fillos e netos, terán que rezar desde onde poidan. Ou acordarse nas vindeiras eleccións.

Puede ver este artículo en la siguitente dirección /blog/chus-gomez/prioridades/202002251940421075018.html


© 2020 Diario de Pontevedra

Lepanto 5, Pontevedra

Tlfno: 986 011 100

(Grupo El Progreso)