O Concello de Bueu continúa co ritmo intenso de actividades culturais, lúdicas e educativas na recta final do mes de xullo cunha programación variada na que hai cabida para todos os gustos e para persoas de todas as idades.
Dentro do programa, na noite deste mércores a Praza Massó acollerá unha nova sesión de cine na rúa, na que se poderá ver a película La oveja Shaun, nunha única sesión, que comezará ás 22.30 horas.
Por outra banda, no Museo Massó, entre as 16.00 e as 21.00 horas, celebrarase un obradoiro de investigación arqueolóxica e vídeo investigación, dirixido a un público xuvenil e adulto. O proxecto, posto en marcha pola Deputación de Pontevedra, ten como obxectivo poñer en valor un conxunto de traballos de investigación en formato audiovisual sobre o patrimonio arqueolóxico da provincia de Pontevedra. O programa consta dunha conferencia a cargo de Adolfo Fernández Fernández sobre as factorías de sal romanas das Rías Baixas, que dará paso ao obradoiro de vídeo-creación, impartido por Producciones Mutantes.
Este xoves na Libraría Miranda Olga Romay presenta Los hijos del senador
Na xornada deste xoves, a Libraría Miranda volve organizar, ás 21.00 horas na sala Amalia Domínguez Búa, a presentación do máis recente libro de Olga Romay, Los hijos del senador.
EMBARCACIÓNS. A Asociación Os Galos trae a Bueu, como cada ano, unha serie de embarcacións no marco co XX Encontro de Embarcacións Tradicionais, que se celebra entre o 29 e o 31 de xullo. Con motivo deste encontro haberá visitas guiadas ao Museo Massó, unha exposición temática na sala Domínguez Búa e proxeccións de documentais, ademais de singraduras pola ría.
O sábado terá lugar a benvida das embarcacións participantes, a recepción e acreditación de navegantes e as travesías de exhibición durante a tarde pola enseada de Bueu, en Lapamán. O domingo está previsto que as embarcacións visiten os pantaláns e realicen travesías polo mar.
Continúan tamén os festivais organizados polas diversas asociacións da vila, no marco da II Semana do Folclore. A Praza Massó acolle o venres a partir das 22 horas o Festival Recordos e nel actuarán o Grupo de Danzas Veciños de Leira (Ordes), a Asociación Cultural Con De Xido (Cambados), e de Recordos da Nosa Terra, organizadores do evento.
Pola súa banda, o Grupo de Gaitas Manxadoira organiza o sábado, ás 22.00 horas, tamén na Praza Massó, o Festival Alborada que contará coa actuación do grupo Güintervan.
Estas actividades completan unha semana intensa na que, na xornada deste martes, celebrouse o Día dos Avós, cunha actividade intexeneracional no Centro de Día Anduriña, e unha merenda solidaria nas pistas da Banda do Río a favor da Asociación Contra o Cancro de Bueu, organizada polo Chef Internacional Alfonso Díaz.
Pola noite, a Praza Massó acolleu o espectáculo de títeres Titiricircus.
