Membros do Servizo de Emerxencias de A Estrada desprazáronse este sábado ata Figueroa para atender os afectados por un accidente de tráfico por envorcado que tivo lugar neste punto de Cerdedo - Cotobade. Segundo informaron a través das redes sociais, o sinistro saldouse con cinco persoas feridas.
A central de coordinación do 061 Galicia derivou ata o lugar do suceso unha ambulancia e unha bomba urbán lixeira (BUL) dos bombeiros.
Non foi a única intervención dunha xornada na que tamén houbo unha colisión por alcance á altura do Rollo en Santa Cristina de Vea e un incendio nun galpón na parroquia de Callobre, entre outros incidentes.
