REÍR, compartir e gozar da cultura musical de cada país desde o máis profundo dos seus garaxes. Son leit motiv da nova xira de Ara Malikian, Royal Garage World Tour.
"A miña relación cos garaxes empezou en 1976, cando estalou a guerra do Líbano. No mundo enteiro as bandas máis modernas ensaiaban en garaxes, sacaban de aí os seus sons e creaban un estilo que cambiaría a historia da música. Eu non me quería quedar sen formar parte desa movida. Eu tiña 10 anos e o meu pai dicíame para convencerme: 'Imos fillo, baixemos ao garaxe, imos montar unha banda de rock como a dos Rolling".
Así evoca o violinista libanés o transfondo desta xira, na que ademais de tocar este domingo en Pontevedra fará unha escala en Ferrol, nos que volve demostrar o idilio que mantén o músico co público galego, xa que para ambos os concertos as entradas están esgotadas.