Efectivos de Medio Rural, de Emerxencias de Cuntis e de Emerxencias da Estrada combinaron esforzos desde pasadas as cinco da tarde deste luns para sufocar o incendio declarado en montes da parroquia de Mesego, Cuntis, que afectou a máis de dez hectáreas de monte arboledo e raso, segundo confirmou a Consellería do Medio Rural.
O lume declarouse antes das 18.00 horas, e desde o Concello dábano por controlado ao redor das 22.00 horas. Aínda que nese momento fontes de Medio Rural non podían dar por estabilizadas oficialmente as lapas, si consideraban que estaban a piques de completar esta tarefa. A esa hora superábase a estimación aproximada de dez hectáreas, aínda que faltaba aínda a medición definitiva.
Na extinción traballaron tres axentes, once brigadas, sete motobombas e unha pa. Tras unhas tres horas de traballo, tiveron que retirarse, por falta de luz os medios aéreos que reforzaban estes labores: catro helicópteros e dous hidroavións.
O alcalde, Manuel Campos, seguiu os traballos desde o monte e aclarou que o Concello tamén achegou medios á extinción. Ademais do seu equipo de Protección Civil, un tractor e un camión.
A pa retroescavadora iniciou os traballos para realizar unha devasa nunha zona de monte raso na que se pretende atallar definitivamente o principal foco. En canto á proximidade de vivendas, a última hora da tarde as chamas situábanse a máis de 500 metros da zona habitada máis próxima, polo que, a pesar da necesidade de persoal para atallar as chamas, os traballos desenvolvéronse coa tranquilidade de que estas estaban afastadas das vivendas.
á última hora, algúns dos efectivos que participaron nesta extinción, entre eles os de Emerxencias A Estrada, partían cara a un novo incendio forestal, en Forcarei.