A Fiscalía pide 3 anos e medio de prisión para cada un dos acusados dun delito contra a saúde pública, aos que interceptaron nun control en Caldas de Reis con máis de 40 gramos de cocaína, e que serán xulgados este xoves na sección cuarta da Audiencia Provincial de Pontevedra.
Segundo o escrito de acusación do ministerio público, estes dous procesados circulaban o 2 de abril de 2019 nun turismo cando foron interceptados nun control da Garda Civil, nun acceso á autoestrada AP-9 en Caldas de Reis. Ao rexistrar o coche e realizarlles un cacheo, os axentes localizaron varios envoltorios que sumaban case 42 gramos de cocaína, así como outro envoltorio con 1,7 gramos de resina de cannabis. Todo iso valorado en case 4.500 euros.
Por iso, considéraos autores dun delito contra a saúde pública e pide para cada un deles a pena de 3 anos e medio de cárcere, así como multa proporcional de 11.650 euros. Con respecto a un dos procesados, a Fiscalía interesa substituír a pena de prisión por expulsión do territorio nacional (con prohibición de volver a España durante 8 anos) no caso de que se confirme que está no país de forma irregular.
OUTRO XUíZO. Por outra banda, tamén o xoves, a sección cuarta da Audiencia Provincial de Pontevedra acollerá unha vista contra outro acusado por un delito contra a saúde pública. Nese caso, trátase dun home que foi interceptado nun control de tráfico na PO-308 en Sanxenxo, en setembro de 2019. Ao realizarlle un cacheo os axentes atoparon varias papelinas que levaba ocultas nos xenitais, e que sumaban uns 3,6 gramos de cocaína. Ademais da droga, parte da cal estaba destinada para a venda e que foi valorada en algo menos de 400 euros, fóronlle intervidos máis de 300 euros.
A Fiscalía pide para este acusado a pena de 3 anos de prisión e o pago dunha multa de 1.100 euros.
