Os alcaldes de Lalín e de Cangas do Morrazo, Rafael Cuíña e Xosé Manuel Pazos, respectivamente, irán da man nas súas reivindicacións para reclamar á Consellería de Sanidade a construción dos seus centros integrais de saúde, polos que levan anos esperando. Ambos os mandatarios pediron este xoves a dimisión do seu titular, Jesús Vázquez Almuíña, por negarse a recibilos, a pesar, din, das "ducias" de reunións solicitadas e por actuar "como axente electoral do PP e non como conselleiro", sinalou Pazos. "Tanto o Concello de Cangas como o Concello de Lalín estamos sendo ninguneados nunha cuestión tan importante como é a sanidade pública", sinalou Cuíña.
As dúas cabeceiras comarcais din compartir situacións similares. Nunha rolda de prensa celebrada no Consistorio morracense, o rexedor de Lalín recordou que o convenio para a construción do seu Centro de Alta Resolución (agora denominado Centro Integral de Saúde) esta asinado desde 2010 e orzado, pero sen executar, a pesar de que os terreos "están para que entre a Consellería cando queira". Igualmente, Pazos acusou o conselleiro de estar "a obviar a promesa" de acordar coa Corporación e cos colectivos locais un estudo sobre a situación da sanidade na localidade.
Ambos os alcaldes reiteran que descoñecen en que consistirán os seus centros integrais, cales son os seus prazos de execución e con que especialidades contarán e acusan a Vázquez Almuíña de actuar de xeito partidista. "É indecente que o conselleiro se plante nun magosto do PP de Lalín a mentirlle á cara ós lalinenes", dixo Cuíña, quen augurou que "este Centro Integral non se vai facer e, probablemente, cando cheguen as eleccións, e non falo do 2019, seguiremos a estar na mesma tesitura". O lalinense reiterou que "hai cuestións", como a sanitaria, "que non deberían ser ardid político", senón que terían que "estar por enriba dos intereses dos partidos".
Pazos subscribiu as palabras do seu homólogo. "Sumámonos á petición de Lalín de que este señor non debe estar un minuto máis nunha consellería tan importante e tan transcendente para os galegos como é a de Sanidade", afirmou.
"Plantarse en Santiago", se é necesario
A reunión e posterior rolda de prensa deste xoves, na que tamén participou en concelleira de Sanidade morracense, Tomás Hermelo, foi o primeiro acto conxunto de protesta de ambos os alcaldes, que non descartan emprender outras medidas de presión, en función de como actúe a Consellería.
Polo momento, o Concello de Cangas tiña previsto remitir este xoves un escrito á Valedora do Pobo "para solicitar que este señor, dunha vez por todas, nos reciba", anunciou o alcalde, en referencia ao conselleiro de Sanidade. "Imos confiar en que asuma o que ten que asumir", engadiu. Pola contra, "se hai que plantarse un día en Santiago e pedir unha reunión conxunta, farase", advertiu.
O seu homólogo lalinense mostrouse "aberto ás propostas que nos faga o Concello de Cangas", partindo da base de que "sempre estaremos enfronte de todos aqueles que intenten coa súa acción partidaria estar contra os intereses xerais dos galegos".
