Un aparatoso accidente de camión obrigou na tarde deste xoves a cortar a estrada de Portela a Souto de Vea, na Estrada. O incidente rexistrouse sobre as 16.00 horas nun tramo coñecido como curvas da Bragada e saldouse sen feridos.
O vehículo, que ía cargado con 15.000 quilos de polbo conxelado, quedou envorcado sobre a calzada. Segundo indicou Protección Civil de Cuntis, todo o produto dáse xa por perdido.
Efectivos de Tráfico e persoal de estradas da Deputación desprazáronse tamén ata a zona para desviar aos coches e facilitar as tarefas de retirada do camión, para as que se mobilizaron dous guindastres. Prevese que os traballos se prolonguen ata a madrugada.