Tres persoas resultaron feridas, unha delas de gravidade, nun choque producido ás 18.35 da tarde deste domingo, na N-640, ao seu paso polo termo municipal de Cuntis. No sinistro víronse involucrados dous vehículos, levándose por diante un posto ambulante de cereixas.
Segundo a información recibida no servizo de urxencias do 112 Galicia, o home que resultou ferido grave é un veciño de Cuntis que estaba xunto á súa muller, tamén ferida, fóra do seu coche coa intención de comprar cereixas no posto. Neste momento a parella foi atropelada por outro turismo, que chocou co seu vehículo. O suceso produciuse na recta de Anllada, no quilómetro 213 da N-640.
Os servizos sanitarios centráronse na atención dos feridos. Dous deles, a muller do matrimonio e un ocupante do vehículo, foron evacuados en ambulancia, e o máis grave, o home atropelado, trasladado no helicóptero medicalizado con base en Santiago.
Ata o lugar do sinistro desprazáronse membros do 061-Urxencias Sanitarias e do GES da Estrada e bombeiros de Vilagarcía. Nun primeiro momento valorouse a posibilidade de que a persoa atropelada estivese atrapada baixo o turismo, aínda que finalmente descartouse esta información.
Tamén se mobilizaron os axentes da Garda Civil de Tráfico e o persoal de limpeza e mantemento do Ministerio de Fomento, para retirar os restos provocados polo accidente e restablecer así as condicións de seguridade na vía.
